د هند دوو ایالتونو کې د سېلاب وژلیو شمېر ۵۸۳ ته ورسېد

د انځور حقوق Getty Images

د هند په شمال ختیځو ایالتونو کې مرګونی سېلاب لا هم روان دی او تېرو ۲۴ ګړیو کې یې یواځې بهار کې ۴۲ نور کسان وژلي دي.

د هند دولتي رسنۍ وايي، په دغه ایالت کې د وژل شویو شمېر ۴۸۲ کسانو ته ورسېد.

پر دې سربېره د هند تر ټولو لوی ایالت اتر پردېش کې هم د سیلاب وژلیو شمېر ۱۰۱ ته پورته شوی.

* د هند وېش: ترهګرۍ ځپلي پښتانه

* چین: هند وايي یو څه او کوي بل څه

د بهار ایالت په ۱۹ ولسوالیو کې نږدې دوه ویشت میلیونه او پنځه لکه وګړي له سېلاب اغېزمن شوي او یو نیم لک خلک ۲۲۲ کمپونو ته کډه شوي دي.

دغه سېلاب نور ایالتونه هم اغېزمن کړي دي.

د هند دولتي رسنۍ وايي، په اسام کې وروستي سېلاب تراوسه ۷۳ کسان وژلي دي.

د انځور حقوق Getty Images

دا سږ کال په دغه ایالت کې د سېلاب دریم وار دی او تراوسه یې په دغه ایالت یو نیم سل کسان وژلي دي.

له بهار او اسام سره تړلي مغربي بنګال ایالت کې اوبه کمېږي، خو دلته یې هم تر ۹۰ پورې کسان وژلي دي.

* د سېلاب مخنيوی

* سېلاب ځپلي ميانمار له نړيوالو مرستې غوښتې

دوه ورځې مخکې د هند لومړي وزیر نرېندر مودي د ریاست له سر وزیر یا اعلی وزیر نتیش کومار سره د بهار ایالت پر سېلاب ځپلو سیمو د هوا له لارې وګرځېد.

نوموړي له سېلاب ځپلو سره ۵۰۰ میلیون روپۍ او سېلاب کې د وژل شویو له کورنیو سره دوه دوه لکه روپۍ مرسته اعلان کړه.

د انځور حقوق Getty Images

اړونده مطالب