د شمالي کوریا نوی توغندی د جاپان پر خاوره تېر شو

د انځور حقوق Getty Images

په جاپان کې خبري سرچینې د شمالي کوریا د نوي توغندي د ازمویلو خبره کوي.

د رپوټونو له مخې، دا توغندی د سې شنبې په سهار ځايي وخت له پیونګ یانک سره نږدې توغول شوی او د سهار شپږ بجې د جاپان په شمال کې د دغه هېواد له خاورې تېر شوی دی.

سوېلي کوریا هم د شمالي کوریا د نوي توغندي د ازمویلو خبره کوي او وايي چې د اتوغندی په سمندرګي کې غورځېدلی دی.

د سوېلي کوریا پوځ وايي، دغه توغندی ۲۷۰۰ کیلومتره تللی دی او لوړوالی یې۵۵۰ کیلومترو ته رسېدلی دی.

د جاپان له خاورې د توغندي تېرېدلو پر مهال خلکو ته خبرداری ور کړل شو، چې ځمکتل ته ننوځي.

د جاپان اېن اېچ کې خبري اژانس وايي، دا توغندی هوا کې پر دریو برخو بېل شو او وروسته د اریمو کنډو ختیځ ته په ۱۱۸۰ کیلومترۍ واټن سره په هوکادیو کې سمندرګي ته وغورځېد.

د امریکا دفاع وزارت پنټګان منلې چې شمالي کوریا نوی توغندی د جاپان پر خاوره تېر شوی دی.

د انځور حقوق Reuters
Image caption د شمالي کوریا مشر له پوځي چارواکو سره.

د دې خبر په اعلانېدلو پسې د جاپان لومړي وزیر شینزو ابې وویل، چې د خپلو وګړو د خوندیتوب لپاره ټول وس کاروي.

ښاغلي ابې دا نوې پېښه د جاپان لپاره بې ساری او سخت ګواښ وباله او له ملګرو ملتونو یې وغوښتل چې د شمالي کوریا پر توغندیز پروګرام فشار ډېر کړي.

د شمالي کوریا توغندي له دې مخکې هم دوه ځلې د جاپان پر خاوره تېر شوي وو، خو پیونګ یانګ په دواړو پېښو کې ویلي چې دغه توغول شوي څیزونه سپوږمکۍ وړونکي توغندي وو.

د شمالي کوریا د وروستیو میاشتو توغندیزو ازموینو د پیونګ یانګ او واشنګټن ترمنځ ناندرۍ ډېرې کړې دي.

د ملګرو ملتونو امنیت شورا د اګسټ پر پنځمه د یوه پرېکړه لیک په تصویبولو سره پر شمالي کوریا بندیزونه سخت کړل.

شمالي کوریا درې ورځې مخکې هم یو لنډ واټنه توغندی وازمویه.

تېره میاشت هم شمالي کوریا د لویو وچو ویشتونکي دوه توغندي وازمویل او له امریکا سره یې د ناندریو په زیاتېدلو پسې ګواښ وکړ چې د دغه هېواد په واک کې ګوام ټاپو شاوخوا اوبو ته به توغندی وتوغوي.

ورته مطالب