بنګله دېش کې د روهېنګیا پر سفر محدويت لگېدلی

Rohingya Muslim refugees walk past discarded clothing on the ground at the Bhalukali refugee camp near Ukhia, 16 September د انځور حقوق AFP

بنګله دېشي چارواکو د دغه هېواد نورو برخو ته د هغو نژدې ۴۰۰ زره روهېنګیا کډوالو پر تګ راتګ یو لړ بندیزونه لګولي دي، چې اګست کې د میانمار له تاوتریخوالي ورتښتېدلي دي.

ځايي پولیسو ویلي روهېنګیا کډوال به یوازې هغو ځایونو کې اوسي، چې حکومت ورته ځانګړي کړي دي او د هېواد نورو سیمو ته سفر نه شي کولای.

بنګله دېش دغه راز له میانماره دغه هېواد ته د کډوال شویو نژدې ۴۰۰ زره روهېنګیا لپاره د مېشتېدا یو هر اړخیز پلان اعلان کړی دی.

چارواکي وايي، خیریه کارکوونکي به د بنګله دېشي پوځ په مرسته یو نوی کمپ جوړ کړي، چې ۱۴ زره موقت مېشت ځایونه به لري.

دغه کمپ به د هغه بل تر څنګ جوړ شي، چې اوس په کې روهېنګیا کډوال مېشت دي.

چارواکي وايي، د مېشت ځایونو په هر واحد کې به شپږ کورنۍ اوسېږي.

تېره میاشت د میانمار په رخاین ایالت کې د تاوتریخوالي له ډېرېدو وروسته ګڼ شمېر روهېنګیا مسلمانان بنګله دېش ته کډوال شوي دي.

د ملګرو ملتونو عمومي منشي د روهېنګیا کډوالو حالت 'مصیبت ځپلی' بللی

م. م. بې تابعیته وګړو ته تابعیت لټوي

بل لور ته د بنګله دېش چارواکو پر میانمار تور پورې کړ چې د دوی پر هوايي حریم یې تېری کړی او دوی یې له امله سخت احتجاج کړی دی.

ډاکه کې چارواکو ویلي د میانمار پوځي چورلکې او ډرون الوتکې له تېرو درېیو ورځو راهیسې څو ځله د دوی هوايي حریم ته ننوتې دي.

بنګله دېش چارواکو پلازمېنه ډاکه کې د میانمار استازی وربللی او په وینا یې په دې اړه یې ورته سخت احتجاج کړی دی. دوی دا یو پاروونکی اقدام بللی.

ملګرو ملتونو میانمار کې د روهېنګیا لږکۍ پر ضد تاوتریخوالی توکمیزه وژنه بللې.

د بشري حقونو فعالان وايي د میانمار پوځ د روهېنګیا توکمو کورونو ته اور ورته کړی دی، خو پوځ دا ردوي او وايي، دوی یوازې د سخت دریځو پر ضد فعالیت کوي او پر ملکي خلکو یې هېڅ برید نه دی کړی.

د ملګرو ملتونو په وینا میانمار کې د تاوتریخوالي له ډېرېدو وروسته نژدې ۴۰۰ زره روهېنګیا مسلمانان بنګله دېش ته کډوال شوي دي.

دغه هېواد کې له مخکې ګڼ شمېر روهېنګیا توکمه کسان مېشت دي.

بنګله دېش چارواکو د ځمکې یوه پراخه ټوټه د روهېنګیا کډوالو لپاره ځانګړې کړې ده.

ویل کېږي دغه سیمه کې به د ۸۰ زره کورنیو لپاره د اوسېدو زمینه برابره شي.

د بنګله دېش یوې ورځپاڼې په رپوټ کې ویل شوي، چې دغه کمپ به پر اته کیلومټره ساحه خپور وي او پخواني کمپ ته څېرمه به جوړ شي.

د ورځپاڼې په خبره کمپ کې به ۸۵۰۰ موقت تشنابونه او کورونه ورغول شي.

بنګله دېش چارواکو اې ایف پي خبري اژانس ته ویلي، د کمپ جوړولو چارې به ۱۰ ورځو کې بشپړې شي او نژدې ۴۰۰ زره کسان به وکولای شي په کې ژوند وکړي.

چارواکي وايي، د شنبې له ورځې روهېنګیا ماشومانو ته د پولیو او روبیلا واکسینو ورکول پیل شوي دي.

د انځور حقوق EPA

د میانمار ډېری اوسېدونکي بودايي مذهب دي او نژدې یو میلیون روهېنګیا مسلمانان په دغه هېواد کې ژوند کوي.

د دوی په اړه میانمار کې داسې فکر کېږي، چې له اره بنګله دېشي کډوال دي.

حکومت دوی ته د میانمار تابعیت له ورکولو انکار کړی دی، خو د روهېنګیا مسلمانانو څو نسلونو دغه هېواد کې ژوند کړی دی.

رخاین ایالت کې له ۲۰۱۲ راهیسې تاوتریخوالی روان دی او ګڼ کسان په کې وژل شوي دي.

اړونده مطالب