کورواک کوردستان د خپلواکۍ ټولپوښتنې پایله وځنډوله

د انځور حقوق Getty Images
Image caption کوردانو د سپټمبر پر ۲۵ د خپلواکۍ ټولپوښتنې ته رایه ور کړه.

د عراق کوردانو د خپلواکۍ لپاره د وروستۍ جنجالي ټولپوښتنې پایله وځنډوله او له بغداد سره یې د اوربند او خبرو وړاندیز وکړ.

د کورواک کوردستان چارواکي په یوه بیان کې وايي، "د نورو نښتو او تاوتریخوالي د مخنیوي لپاره مسوولانه چلند ته ژمن دي".

په بیان کې وړاندیز شوی چې په سیمه کې "ټول پوځي عملیات" ودرول شي.

* کورد ټولپوښتنه بلوڅانو ته څه انګېزه ورکوي؟

* کورد ټولپوښتنه، عراق ماتېږي که بله جګړه کې ښکېلېږي؟

د عراق کوردانو د تېر سپټمبر پر ۲۵ په ټولپوښتنه کې خورا لوی اکثریت سره خپلواکۍ ته رایه ور کړه، خو دغه ټولپوښتنه د عراق د مرکزي حکومت او د هغه د دوو ګاونډیانو ایران او ترکیې له سخت مخالفت سره مخ شوه.

د کورواک کوردستان بیان کې زیاته شوې: "د جګړې دوام به یو لوری هم بریالی نه کړي، بلکې هېواد به له تاوتریخوالي او ګډوډۍ سره مخ کړي".

د عراق لومړي وزیر تېره میاشت د دې ټولپوښتنې د پایلو د "ناچلېدو" غوښتنه وکړه.

حیدر عبادي وویل، "دا ټولپوښتنه له یو بل سره د عراقیانو سوله ییز ګډ ژوند او د سیمې لپاره خطر او د عراق حاکمیت ته ګواښ دی".

د انځور حقوق AFP
Image caption د عراق حکومتي ځواکونو له تېرې اونۍ راهیسې له کوردانو جنجالي سیمې ونیولې.

تېره اونۍ چې د عراق حکومت په تېلو بډای ښار کرکوک او نوروې سیمې له کوردانو ونیولې د دواړو لورو ترمنځ نښتې رامنځ ته شوې.

د کورواک کوردستان د بیان له مخې هغه نښتې او بریدونه چې د اکتوبر له ۱۶ د عراقي ځواکونو او پېشمرګو ترمنځ پیل شوي... اوږدمهالې وینې تویونې ته لار جوړوي.

د کورواک کوردستان ټولپوښتنه د خپلواکۍ پلوو په ګټه تمامه شوه، خو د عراق مرکزي حکومت له اوله ور سره مخالف و.

د دې سیمې د ټاکنو کمېسون وايي، ۳ میلیونه او درې لکو کسانو په دې ټولپوښتنه کې ګډون کړی او له ډلې یې ۹۲ سلنه خپلواکۍ ته رایه ور کړې ده.

* د عراق کوردان ولې ازادي غواړي؟

* بغداد له اربیل تر ۳ ورځو د هوايي ډګرونو واک غواړي

ایران، ترکیه، اروپايي ټولنه او امریکا هم په دې برخه کې د بغداد د دریځ ملاتړ کوي.

ایران او ترکیه په دې باور دي چې د عراقي کوردانو تر خپلواکېدو وروسته به د دوی کوردان هم د ډېرو امتیازونو غوښتلو او خپلواکۍ لپاره بریدونه ډېر کړي.

اروپايي ټولنه او امریکا وايي، دا ټولپوښتنه په عراق کې د اسلامي دولت ضد هڅې له خنډ سره مخ کوي.

د عراق حکومتي ځواکونو له ټولپوښتنې وروسته د کرکوک په ګډون د بغداد او اربیل ترمنځ جنجالي سیمې ـ چې پخوا د کورواک کودرستان په لاس کې وې- ونیولې.

د انځور حقوق Getty Images
Image caption ټولپوښتنه کې ۹۲ سلنه خلکو خپلواکۍ ته رایه ور کړې.

له دې مخکې رپوټ شوې چې د عراق د کورواک کوردستان پارلمان کې درې اغېزناکو ګوندونو د پارلمان او کورواک ریاست لپاره ټاکنې اته میاشتې ځنډولې دي.

د درې واړو ګوندونو- ډیموکراټ ګوند، وطني ټولنه او د کوردستان اسلامي یووالی- د هوکړې له مخې د پارلمان اوسنۍ دوره اته میاشتې اوږدېږي او د نویو استازو تر ټاکل کېدو به کار کوي.

دا هوکړه په داسې مهال ده چې د خپلواکۍ لپاره په ټولپوښتنه پسې د عراق د مرکزي حکومت او کورواک کوردستان ترمنځ تاوتریخوالی ډېر شوی دی.

ورته مطالب