نړيوالو په يوۀ خولۀ د سلمان تاثير وژنه وغندله

بن کي مون
Image caption د ملگرو ملتونو سرمنشي بن کي مون د سلمان تاثير وژنه پاکستان ته ضايعه وبلله

د پاکستان د پنجاب ايالت والي سلمان تاثير لومړنى لوړ پوړى پاکستانى چارواکى دى چې په تيرو درو کلونو کې وژل کيږي .

درې کاله وړاندې پخوانۍ لومړۍ وزيره بېنظير بوټو وژل شوې وه .

دا وژنې د پاکستان د سياسي تربگنيو او ترينگلي حالت ښکارندويي کوي .

سلمان تاثير هم د بېنظير بوټو په څير د پيپلز گوند غړى و ، ازاد خياله او د اسلام پالو د ځينو نظرونو مخالفى کس و .

په ملگرو ملتونو کې د پاکستان سفير حسين حقاني بي بي سي ته وويل چې د والي سلمان تاثير د وژنې دليل هم ښايي همدا وي :

(( دا ښکاره ده چې سلمان تاثير د خپل زړور دريځ له امله په نخښه شوى دى ، هغه دريځ چې دين ته د سپکاوي په نامۀ انسان جوړ کړى قانون و ، ډير خلک په دې باور دي چې پر دغه قانون بايد له سره غور وشي . دا د پاکستان لپاره د دوو جلا نظرونو خبره ده ، د ځانگړو تيوريو خاوندان او ديموکراتان جلا نظر لري . ))

د ملگرو ملتونو سرمنشي بن کي مون د سلمان تاثير وژنه غندلې ده .

ښاغلي بن کي مون د پنجاب وژل شوى والي د پاکستان د يوۀ لوى مشر له منځه تگ وبالۀ .

د متحدو ايالاتو د بهرنيو چارو وزارت د پنجاب د والي وژڼه پاکستان ته لويه ضايعه بللې ده .

په واشنگټن کې د بهرنيو چارو د وزارت په يوۀ خبرپاڼه کې ويل شوي چې سلمان تاثير د پاکستاني حکومت او ولس له هغو هلو ځلو سره مرسته کوله چې غواړي هيواد ته سوله او ثبات ستون کړي .

د برتانيا د بهرنيو چارو وزير ويليم هيڅ د سلمان تاثير پر وژنې هېښتيا ښوولې ده او وايي پاکستان يو ښه مشر له لاسه ورکړ .

د برتانيا د حکومت مخالفې کارگر گوند يوۀ وياند پر برتانيايي حکومت غږ کړى چې د اسلام پالې اورپکۍ په څير ننگونو کې له پاکستان سره مرسته وکړي .

د اروپايي ټولنې لوړ پوړو ديپلوماتانو هم د پنجاب د والي وژنه غندلې ده. اروپايي ټولنې په يوه خبرپاڼۀ کې له پاکستاني حکومته غوښتي چې د دغې پېښې عاملين ژر تر ژره ونيسي او محاکمه يې کړي .

د بشري حقونو د څار ټولنې د سلمان تاثير په باب ويلي چې دى يو کم سارى سياستوال و چې خپل ژوند يې قرباني کړ .