د هند د باندینیو چارو وزیر د کرزي له مرستیالانو سره وکتل

ښاغلی کرېشنا
Image caption ښاغلي کرېشنا په نوي ډيلي کې خبريالانو ته ويلي چې هغه به افغانستان ته پخپل دوه ورځني سفر کې له افغان چارواکو سره د طالبانو او افغان دولت د سولې پر بهیر او په دې برخه کې د پاکستان په رول هم وغږېږي.

په کابل کې د هند سفارت وايي ښاغلي کريشنا د خپل سفر پر لومړۍ ورځ د ولسمشر له دواړو مرستيالانو او دو لسي جرګې له مشر يونس قانوني سره ليدلي او د دواړو هېوادونو تر منځ د اړيکو پر پراختيا يې ټينګار کړی دی .

د سفارت يوې سرچينې چې نه يې غوښتل نوم او غږ يې خپور شي بي بي سي ته وويل ښاغلی کريشنا به نن له ولسمشر حامد کرزي، د بهرنيو چارو وزير زلمي رسول، د ملي امنيت سلاکار رنګين دادفر سپينا او د مشرانو جرګې له مشر حضرت صبغت الله مجددي سره وګوري .

دغه سرچينه وايي ښاغلی کريشنا به افغان چارواکو ته په بېلا بېلوبرخو کې د خپل دولت د مرستو د د وام ډاډ ورکړي .

هند په افغانستان کې شاوخوا څلور زره کارکوونکي لري چې د بيارغونې په پروژو کې پردندو بوخت دي . د هند سفارت ويلي ښاغلی کريشنا به له افغان لوري سره به په خبرو کې د هغوی د امنيت موضوع هم ياده کړي .

دا په ۲۰۱۱ کال کې د هند د بهرنيو چارو د وزير اېس، ايم کرېشنا لومړنی بهرنى سفر دى چې کابل ته يې کوي .

ښاغلى کرېشنا داسي مهال کابل ته سفر کوي چې د افغانستان د سولې د عالي شورا پلاوی له پاکستاني چارواکو سره د سولې او له طالبانو سره د روغې جوړې پر لارو چارو بوخت دى .

هند پخوا له طالبانو سره د افغانستان د حکومت د سولې پر هلو ځلو اندېښنه ښکاره کړې وه.

هندي چارواکي وېره لري چې که طالبان د افغانستان په حکومت کې شریک شي، نو ښايي په افغانستان کې د پاکستان نفوذ زیات شي .

د بهرنيو چارو وزارت وياند احمد ظاهر فقيري وايي چې ښاغلى کرشنا به په دغه سفر کې له افغان چارواکو سره د همکاريو په بيلابيلو برخو خبرې اترې وکړي :

''ټاکل شوې چې د افغانستان د باندینیو چارو وزیر په بلنه د هند د بهرنیو چارو وزیر کابل ته راشي. دواړه وزیران به د سیمه ییزو او دوه اړخیزو مسایلو پر سر خبرې وکړي. د هند لومړی وزیر به د افغانستان له ولسمشر حامد کرزي سره هم وویني.''

هند په کابل کې پر سفارت سربېره په جلال اباد، کندهار، مزارشریف او هرات کې کونسلګرۍ لري او پاکستان بیا دا کونسلګرۍ د خپل ملي امنیت لپاره ګواښ او خطر بولي.

افغان چارواکي په دې برخه کې د پاکستان اندېښنه په کلکه ردوي او وايي چې د هند په څلورو کونسلګریو کې یوازې دوې يې په داسي ولایتونو کې دي چې له پاکستان سره گډه پوله لري .

د هند د بهرنیو چارو وزیر کابل ته تر خپل سفر وړاندې خبريالانو ته ويلي وو چې په افغانستان کې د هند دیپلماتیک مرکزونه له پر پسې خطرونو سره مخامخ دي خو په وينا يې ولسمشرکرزي ورسره تر سفر وړاندې هم ژمنه کړې چې د دغو مرکزونو د خونديتوب لپاره يې خپلو امنيتي ځواکونو ته سپارښتنې کړې دي .

Image caption د ۲۰۰۸ کال جولای کې په کابل کې د هند پر سفارت د بريد په ترڅ کې دوه هندي دیپلماتان ووژل شول.

دا رنگه ښاغلي کرېشنا په نوي ډيلي کې خبريالانو ته ويلي چې هغه به افغانستان ته پخپل دوه ورځني سفر کې له افغان چارواکو سره د طالبانو او افغان دولت د سولې پر بهیر او په دې برخه کې د پاکستان په رول هم وغږېږي.

د ۲۰۰۸ کال جولای کې په کابل کې د هند پر سفارت د بريد په ترڅ کې دوه هندي دیپلماتان ووژل شول.

هغه مهال هندي او افغان چارواکو هغه برید د پاکستان د 'لشکرطیبه' کار بللی وو.

هند د افغانستان په بیارغونه کې په سلگونه ميلیونه ډالر لګولي او ۴۰۰۰ کارګر او کارپوهان یې د افغانستان د بیارغونې په بېلابېلو پروژو کې په کار بوخت دي.

د هند د باندنیو چارو وزیر به له افغانستان چارواکو سره په خپلو کتنو کې د دغو کارګرو او کارپوهانو د امنیت په باب هم وغږېږي.

ورته مطالب