مصر: لومړي وزیر د یووالي غوښتنه وکړه

مصر
Image caption ځینو پوځي ګاډو ته هم اور ورته شوی، او د ترانسپورټېشن سیستم په ټپه درېدلی دی.

د مصر لومړي وزیر د دغه هېواد ټول قومونه یووالي ته راوبلل.

عصام شرف دا غوښتنه تر هغه وروسته وکړه، چې د پولیسو او قبطي لاریون کوونکو ترمنځ په اخ و ډب کې لږترلږه ۲۴ کسان ووژل شول او ۲۱۷ نور ټپیان شول.

ښاغلي شرف دا ډول لاریونونه او اړدوړ یو سپک عمل بللی دی.

لومړي وزیر عصام شرف د وزیرانو یوه بېړنۍ غونډه راغوښتې، چې د روان کړکېچ په اړه جدي تصمیم ونیسي.

نوموړي په یوه تلوېزیوني وینا کې ویلي، ''مصر کې سپکې توطيې روانې دي، وروستۍ پېښې ښيي چې د دغه هېواد دښمنان زموږ یووالی نه غواړي.''

دی زیاتوي ''د قاهرې په زړه کې د اړدوړ جوړوونکو په منځ کې خارجي او داخلي پټ لارسونه دي، چې د مصر د دیموکراتیک نظام د پایېدو مخه نیسي.''

''د ماسبیرو په سیمه کې چې د یکشنبې پر ماخوستن کومه پېښه وشوه، زموږ د پرمختګ پرځای د شاته پاتې کېدو سبب کېږي، او موږ یوه عصري، غوره او دیموکراتیک دولت جوړولو ته نه پرېږدي.''

د قاهرې وضعیت

مصري پوځ په قاهر کې تېره شپه ګرځبنديز ولګاوه.

په قاهره کې زموږ خبریال عمرو جمیل وايي، د هغه مصري روغتون مخې ته پر رمسیس سړک نښتې وشوې، چې د ماسبیرو مړي او ژوبل کسان وروړل شوي وو.

ځینو پوځي ګاډو ته هم اور ورته شوی، او د ترانسپورټېشن سیستم په ټپه درېدلی دی.

بل خوا، د پولیسو د عسکري لوا قومندان حمدي ب دین ویلي چې قاهره څه-ناڅه ارامه شوې ده.

شرق الاوسط د ښاغلي بدین په حواله ویلي، د واټونو وضعیت اوس ارامه دی.

مصري تلوېزیون ویلي، لسګونه اړدوړ جوړوونکي نیول شوي.

ورته مطالب