ايران نور توغندي ازمويلي خو وايي هرموز به نه تړي

ايران ازموينې
Image caption د ايران سمندري ځواکونو ويلي د توغنديو دواړه ازموينې يې بريالۍ وې.

ايران وايي په هرموز تنګي کې به د بېړيو تګ راتګ پر مخ خنډونه نه جوړوي.

په دې وينا يې خپل هغه ګواښ نرم کړی چې تېره اوونۍ يې د سمندر دغې بوختې سيمې په اړه کړی و.

دغه تنګی د تېلو لېږدونې لپاره د نړۍ يوه مهمه لار بلل کېږي.

تېره اوونۍ ايران ګوتڅنډنه کړې وه که يې لوېديځ د تېلو پر صادرونې بنديزونه ولګول دوی به دغه تنګی وتړي.

دغه اعلان په هرموز تنګي کې د پوځي سمندري تمرينونو پر وروستی ورځ شوی، چې ايران يې په اړه ويلې ګنې په بريالي ډول يې دوه نور توغوندي هم په کې ازمويلي دي.

دغه تمرينونه د پوځي ځواک ښوونه ګڼل کېږي.

د ايران سمندري ځواکونو ويلي د توغنديو دواړه ازموينې بريالۍ وې، او په وينا يې د ايران په خپله جوړ کړي بېړيو-ضد توغندي وو، چې خپله موخه يې ويشتلې او ويجاړه کړې ده.

فرانسې دغه ازموينې د خواشينۍ وړ بللې دي. د ايران د سمندري حواکونو يوه قوماندان حبيب الله سياري د خپل هېواد حکومتي ټلوېزيون ته وويل چې ګنې ايران پر هرموز تنګي ولکه لري:

"هرموز تنګی په بشپړ ډول زموږ په واک کې دی، بشپړ امنيت يې زموږ په واک کې دی او د هرموز تنګي کنټرول مو هم په بشپړه په واک کې دی."

د بي بي سي د ايران چارو خبريال جېمز رېنولډز وايي ايران له خپلو پوځي تمرينونو په ګټه غواړي وښيي ګنې خليج د دوی ملکيت دی او دومره پوځی توان لري چې د خپلې واک لرنې پروړاندې د هر ګواښ دفاع وکړي.

اتومي پروګرام او د بنديزونو لګونې فشار

د ايران پوځی تمرينونه په داسې وخت کې ترسره کېدل چې د ايران او لوېديځ ترمنځ د دغه هېواد د اتومي هيلو پر سر ترينګلتيا په زياتېدو ده.

تېره اوونۍ تهران د هغو راپورنو په اړه غوسه ناک غبرګون څرګند کړ چې په ويل شوي وو، ګنې لوېديځ هېوادونه پر ايران د لا نورو بنديزونو لګولو تابيا لري چې موخه يې تېلو او مالي چارو برخې دي.

خو د بي بي سي خبريال وايي ايران د بنديزونو د اغېز په اړه اندېښمن دی، او هيله لري نړۍ ته وښيي چې لا تر اوسه د دې توان لري چې دکومې بلې خوا له مرستې پرته هم خپل پوځي ځواک جوړ کړي.

د ايران د سمندري ځواکونو قوماندان حبيب الله سياري خبرې له دغې هيلې سره تړلې ښکارېدې. ده وويل ايران د خپل ځان ساتنې لپاره پوځي ځواک لري:

"موږ په نړيوالو اوبو کې له خپلو پولو، او د ايران اسلامي جمهوريت سپېڅلي نظام له سرچينو او ګټو دفاع ته چمتو يوو، او هېڅ غليم به پرې نه ږدو چې زموږ ګټې وګواښي"

Image caption د ايران پوځی تمرينونه په داسې وخت کې کېږي چې د تهران او لوېديځ ترمنځ د دغه هېواد د اتومي هيلو پر سر ترينګلتيا په زياتېدو ده.

دا روښانه ده چې له اتومي پروګرام سره په تړاو به پر تهران د لوېديځ فشار زياتېږي.

خو دا چې د بنديزونو زياتېدو او اقتصادی کړۍ په راتنګېدو به د تهران غبرګون څه وي، ډېر کم داسې باور کوي چې ايران به ګنې هرموز تنګی وتړي.

ځکه که داسې وکړي نو دا به د تهران لپاره له اقتصادي، سياسي او کېدی شي پوځي پلوه زيان رسوونکی وي.

ايران د خپلو عايداتو نيمه برخه د خامو تېلو له صادراتو ترلاسه کوي، او د تېلو لوړه بيه د تهران حکومت د پيسو او ځواک دواړو له پلوه خوندي ساتي.

ورته مطالب