اوباما د سوريې کیمیاوي وسلو په اړه اندېښمن دی

د خپريدو وخت: 23:41 گرینویچ - دوشنبه 20 اگست 2012 - 30 زمری 1391

ښاغلي اوباما ويلي چې واشنګټن په دې تړاو جزیات له نژدې څاري.

د امریکا ولسمشر بارک اوباما خبرداری ورکړی چې د سوريې د کیمیاوي وسلو لېږد او یا ځای پر ځای کول د امریکا لپاره د خطر زنګ دی.

په دې وروستیو کې داسې نا تایید شوي رپوټونه ورکړل شوي وو چې د سوريې چارواکي د هغه هېواد د پراخو ویجاړونکو وسلو زېرمې له خپله ځایه خوځولې دي.

ښاغلي اوباما ويلي چې واشنګټن په دې تړاو جزیات له نژدې څاري.

د بي بي سي خبریاله کېم غتاس وايي د امریکا ولسمشر بارک اوباما خبرداری ورکړی چې په سوريه کې د کیمیاوي او بیولوژیکي وسلو کارول او خوځول را خوځول به يې پر سوريې باندې د پوځي یرغل په برخه کې د ده دریځ بدل کړي.

ښاغلي اوباما وويل که څه هم ده پر سوريې د پوځي مداخلې امر نه دی کړی خو امریکا یو شمېر احتیاطي پلانونه جوړ کړي دي.

ښاغلي اوباما زیاته کړه چې واشنګټن د ولسمشر بشر السد رژيم او په هېواد کې نورو چارواکو ته په ډاګه ويلي چې د پراخو ویجاړونکو وسلو کارونه او یا خوځونه به د سره څراغ په مانا وي او ډېرې پایلې به ولري.

ښاغلي اوباما پر دې هم اندېښنه وښوده چې دغه وسلې د اورپکو او ناخوندي کسانو لاسونو ته و نه لوېږي.

بارک اوباما وويل د سوريې کیمیاوي او بیولوژیکي وسلې نه یوازې د امریکا لپاره د خطر زنګ دی بلکې د اسراییل په شان يې په سیمه کې نورو ملاتړو ته هم د ژورې اندېښنې وړ دی.

په دې اړه نور مطالب

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .