اخضر ابراهیمي: د سوریې حل ته جادويي فورمول نه لرم

د خپريدو وخت: 06:02 گرینویچ - 02 سپتمبر 2012 - 12 وږی 1391
ابراهیمي

ابراهیمي د بشارالاسد د نظام کې بدلون یوه لویه اړتیا وبلله.

په داسې حال کې چې د سوریې په حلب، ادلب او درعا کې سختې نښتې روانې دي، د سوریې لپاره د ملګرو ملتونو او نړیوالې ټولنې استازي اخضر ابراهیمي پر ښکېلو غاړو غږ د جګړې درولو غږی کړی دی.

ابراهیمي په جګړه کې ډېر مسؤولیت د حکومتي پرغاړه بللی دی.

نوموړي له العربیه تلوېزیون سره په خبرو کې ویلي چې د سوریې حل یو نوی سیاسي چوکاټ غواړي، چې په وینا یې لاهم سوریې ته د نړیوالو ځواکونو د لېږلو لپاره وخت شته.

پر همدې مهال د ټلوالې د راپورونو له مخې د تېرې شنبې په ورځ په سوریه کې د حکومتي ځواکونو په ډزو لږترلږه ۱۵۶ کسان وژل شوي دي.

"بدلون ضروري دی "

ابراهیمي د بشارالاسد د نظام کې بدلون یوه لویه اړتیا وبلله، او زیاتوي چې د سوري ولس روا غوښتنې باید ومنل شي:

" سوري حکومت تر موږ ټولو ښه پوهېږي چې ولس له کوم ډول کړاوونو سره مخامخ دی ".

ابراهیمي، په نیویارک کې د خبرو پر مهال د اوربند غوښتنه وکړه، او زیاته یې کړه د هغو موانعو د لیرې کولو هڅه به وکړي، چې سلف یې کوفي عنان د سولې په بهیر کې ورسره لاس او ګرېوان وو.

"سادګي "

"هغه کسان چې له دمشق او نورو سیمو د ځواکونو وتلو ته لېواله دي، یا خو ډېر ساده کسان دي، او یا هم دا هسې ملنډې وهل دي."

سیرګي لاوروف

بل خوا، د تېرې شنبې په ورځ روسیې ویلي وو، دا به ډېره سادګي وي چې نړیوال قوتونه له ولسمشر بشارالاسد د ښار له لویو ښارونو د خپلو ځواکونو د ایستلو تمه ولري، همدارنګه مخالفین هم دې کار ته غاړه نه ږدي.

د روسیې د بهرنیو چارو وزیر سیرګي لاوروف وویل، دا کار له سوري نظام څخه د غاړې اېښودو په مانا دی، چې په وینا یې لوېديح او عربي هېوادونه ددا ډول غوښتنې کولو حق نه لري.

لاوروف په مسکو کې د نړیوالو اړیکو د حکومتي انستتیوت په یوه ناسته کې وویل "کله چې زموږ ملګري وايي، د سوریې حکومت باید جګړه بس او خپل ځواکونه او سولې له ښارونو وباسي، او له مخالفینو هم دا غوښتنه ولري، نو دا هېڅ نه عملي کېدونکی پلان دی."

دی زیاتوي: "هغه کسان چې له دمشق او نورو سیمو د ځواکونو وتلو ته لېواله دي، یا خو ډېر ساده کسان دي، او یا هم دا هسې ملنډې وهل دي."

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .