چین:په درملو کې د خچنو غوړو کارولو په اړه تحقیقات کیږي

د خپريدو وخت: 12:47 گرینویچ - دوشنبه 03 سپتمبر 2012 - 13 وږی 1391
چین

په چین کې پولیس وايی داسې کارخانې يي معلومې کړې چې په پټه خچن غوړي جوړوي

په چین کې چارواکو درمل جوړونکو کمپنیو ته ویلی چې باید د خپلو درملو په وېشونکو څار زیات کړي. د دولتي رسنیو په خبره دغه څرګندونې له هغه وروسته کیږي، چې د یو شمېر کمپنیو په اړه داسې رپوټونه ورکړل شول، چې ګواکي د انټي بایوټیک درملو په جوړولو کې (خچن غوړ) کاروي.

چارواکي د هغو کمپنیو په اړه تحقیقات کوي چې په اړه يي ویل کیږي، د درملو په جوړولو کې د ګران بیه سویابین غوړو په ځاي ارزان بیه استعمال شوي غوړي کاروي.

خچن غوړي هغه غوړي دي، چې د رېستورانونو په پخلنځیو کې له استعمال وروسته بیاځلي پروسس کیږي. دا په چین کې د روغتیا په اړه د ناوړه کړنو د افشا کېدو د لړۍ یوه بله پېښه ده.

په دې اړه له زیاتو معلوماتو ورکولو پرته حکومتي چارواکو وویل ژر به د خپلو تحقیق نتېجې اعلان کړي.

تر اوسه پورې معلومه نه ده، چې په دې ډول د چمتو کړل شویو درملو له امله بشري روغتیا ته څومره او څه ډول خطر متوجه دی، خو په بیجینګ کې د بی بي سي د خبریال مارټن پېښینس په خبره، دغه ډول پېښې ثابتوي چې په دغه هېواد کې یو شمېر کمپنۍ د زیاتې ګټې تر لاسه کولو لپاره له څه ډول لارو چارو ګټه اخلي.

په چین کې د خچنو خوړو او اوس د دغه ډول غوړو د کارولو پېښو رسوا کېدو له کبله په چین کې د وروستیو کلونو په اوږدو کې ډېرې اندېښنې راپورته شوې دي.

په اپریل میاشت کې د دغه هېواد دولتي رسنیو داسې رپوټونه خپاره کړل چې په کې ویل شوي و، د دغه هېواد چارواکو یو شمېر داسې پټې کارخانې معلومي کړي او کارکونکي يي نیولي چې د ځناورو له وازدو يي خچن غوړي جوړول.

د پولیسو په خبره دغه ډول غوړي په یو شمېرهغو غوړو جوړونکو کمپنیو پلورل کېدل، چې په خوړو کې او په ریستورانونو کې د کارولو لپاره غوړي جوړوي.

د پروسږ کال په سپتامبر کې د دغه هېواد پولیسو د خوړو لپاره د کاریدونکو غوړو په نوم د خچنو غوړو د خرڅلاو په تور ۳۲ تنه ونیول.

د چین په ۱۴ ولایتونو کې دغه ډول ۱۰۰ ټنه غوړي ونیول شول چې په شپږو پټو کارخانو کې تولید شوي و. دغه کار د پولیسو له څلور میاشتني تحقیق وروسته وشو.

په ۲۰۰۸ کال کې د یو ډول څښاک له امله چې په کیمیايي موادو لړلی و، لږ تر لږه شپږ تنه ماشومان ووژل شول او تر درې زرو پورې ناروغ شول.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .