د سوریې په جګړه کې درنه مرګ ژوبله اوښتې

د خپريدو وخت: 04:56 گرینویچ - جمعه 21 سپتمبر 2012 - 31 وږی 1391
syria

د سوري یاغیانو یوې ډلې ویلی، چې د بمبارۍ پر مهال خلک په پټرول پمپ کې د تېلو تر لاسه کولو لپاره په کتار کې ولاړ وو.

په سوریه کې حکومت مخالف فعالان وايي د دغه هېواد جنګي الوتکو د هېواد په شمال ختیځ کې پر یوه پټرول پمپ بمونه غورځولي چې په کې لږ تر لږه دېرش تنه وژل شوي دي.

د سوري یاغیانو یوې ډلې ویلی، چې د بمبارۍ پر مهال خلک په پټرول پمپ کې د تیلو تر لاسه کولو لپاره په کتار کې ولاړ وو.

په غیر تاييد شويو تصویرونو کې چې پر انټرنیټ خپاره شوي، یو شمېر ګاډي لیدل کیږي چې سوځېدلي دي. دیاغیانو د یوې ډلې په خبره د دې پېښې ۷۰ تنه ټپیان ځايي روغتون ته وړل شوي دي.

په سوریه کې د بشري حقونو لپاره یوه کارکونکي اې ایف پې خبري اژانس ته ویلي چې د برید پرمهال په پټرول پمپ کې ډېره ګڼه ګوڼه وه.

د سوریې حکومت مخالفان وايي له الوتکې نه چاودېدونکي مواد په پټرول پمپ وغورځول شول، چې د چاودلو له امله یې ډېره مرګ ژوبله اوښتې ده.

د یادونې ده چې سوریې ته بهرني خبریالان نه پرېښودل کیږي او له همدې امله په دغه ډول پېښو کې د مرګ ژوبلې تایید کول اکثر مهال ستونزمن وي.

له دې مخکې د سوریې د حکومت یو هیلکوپتر غورځېدلی و.

په پیل کې ویل شوي و، چې سیرین ابزروریټې ډله د مشق ته څېرمه د یوه هیلیکوپتر د را غورځولو ادعا کوي خو خپلواکو سرچېنو دغه خبر تایید نه کړ.

د سوریې حکومت د خپلو مخالفانو د تحریک ځپلو لپاره چې یو کال مخکې پیل شوی و، په جګړه کې د الوتکو او هیلیکوپترونو کارونه ډېره کړې ده.

په سوریه کې د پنج شنبې په ورځ له پلازمېنې دمشق او شمالي ښار حلب نه د سختو جګړو رپوټونه تر لاسه شوي دي.

د سوریې د دولتي ټیلویزیون په یوه رپوټ کې ویل شوي چې حکومتي ځواکونو سل تنه ترهګر وژلي دي.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .