له سوري یاغیانو سره "سعودي وسلې" لیدل شوې

د خپريدو وخت: 05:19 گرینویچ - سه شنبه 09 اکتوبر 2012 - 18 تله 1391
اوکرایني وسلې

د بي بي سي خبریال ته ددغو کرېټونو د ننه څیزونو د لیدو اجازه ورنه کړل شوه.

بي بي سي داسې شواهد موندلي، چې ښيي د سعودي عربستان پوځ لپاره لېږلې شوې وسلې د سوريې د ياغيانو په يوه اډه کې موندل شوي.

په سوريه کې د بي بي سي يوۀ خبريال په حلب ښار کې د ياغيانو په يوۀ کمپ کې د وسلو يوۀ شرکت ته اړوند يو کرېټ ليدلى چې ورباندې د سعودي عربستان پته ليکل شوې وه.

د بي بي سي خبريال وايي داسې باور دى چې د سوريې حکومت مخالفو ته تلونکو وسلو لپاره چې کچه يې په زياتيدو ده د غو ياغيانو خليجي ملاتړي پيسې ورکوي.

په سوریه کې د مخالفانو په یوه اډه کې درې داسې صندوقونه لیدل شوي، چې پرې د سعودي د پوځ له لوري سپارښتنې لیکل شوي دي.

دا چې دغه درې واړه کریټونه څرنګه سوریې ته رسېدلي، لاهم څرګنده نه ده او د بي بي سي خبریال ته هم اجازه نه ده ورکړل شوې چې د دغو کریټونو په منځ کې څه وګوري.

سعودي عربستان په دې اړه له څه ویلو تر اوسه ډډه کړې ده.

پټ لاسونه

د سوریې حلب ښار په یوه جومات کې د وسلو دغه صندوقونه د اوکراین د وسلې جوړونې د یوه شرکت تولید دی، چې پرې Dastan لیکل شوي.

که څه هم ددغو صندوقونو د منځپانګې په اړه معلومات نه شته، خو په حلب کې د بي بي سي خبریال ایان پنل وايي، چې دغه کریټونه ددې څرګندويي کوي چې په سوریه کې د بشارالاسد د نظام ړنګولو لپاره ځینې ګاونډي هېوادونه لاسوهنې کوي.

د بي بي سي د امنیتي چارو خبریال فرانک ګاردنر وايي، سعودي عربستان غواړي په پټه خپلو بهرنیو هدفونو ته ورسېږي.

بل خوا د سوریې د حکومت مخالفو سرچینو بي بي سي ته منلې ده، چې دوی له عربستان او قطر څخه مرستې ترلاسه کوي.

د نښتو دوام

بل خوا، د دمشق په شاوخوا کې د یوې درنې چاودنې غږ اورېدل شوی دی.

همداشان، د سوریې د بشري حقونو یوې ډلې ویلي چې د مخالفینو پر مرکزونو د هوايي بریدونو له کبله لږترلږه ۲۳ کسان وژل شوي دي.

دغه ډله دا هم وايي چې د درعا جنوبي ولایت په ختيځه الکراک سیمه کې د حکومتي ځواکونو بمبارۍ ۲۰ نور کسان وژلي دي.

دوی وايي چې په وژل شوو کې د ټلوالې پنځه غړي هم دي.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .