د سوريې الوتکې د ترکيې په حریم بندې شوې

د خپريدو وخت: 22:07 گرینویچ - 14 اکتوبر 2012 - 23 تله 1391

د سوریې او ترکيې تر منځ اړیکې، په زور د سوريې الوتکې له کوزولو وړاندې لا مخ په خرابېدو وې.

ترکیې پر خپل حریم د سوري الوتکو پر الوتنې بندیز ولګاوه.

ترکیه دا پړېکړه تر هغې وروسته کوي چې د شنبې په ورځ (اکتوبر/۱۳) سوريې اعلان وکړ چې له دې وروسته به د هغه هېواد په هوايي حریم کې د ترکيې مساپر وړونکې الوتکې د پرواز اجازه و نه لري.

د ترکیې د بهرنیو چارو د وزارت یوه چارواکي وويل: له دې وروسته به د سوريې مساپر وړونکې او پوځي الوتکې د ترکيې په هوا کې د پرواز اجازه و نه لري.

پر ترکي الوتکو د الوتنې بندیز سوريې له هغه څو ورځې وروسته اعلان کړ چې ترکيې د هغه هېواد یوه مساپر وړونکې الوتکه ناستې ته مجبوره کړه.

د ترکيې چارواکو په هغه الوتکه کې د "جنګي وسلو" د شتون ادعا وکړه او ويل يې چې د سوريې دفاع وزارت ته لېږدول کېدې، هغه ادعا چې دمشق يې په کلکه ردوي.

خو د روسيې د بهرنیو چارو وزیر بیا په هغه الوتکه کې د خپلو هېوادوالو د شتون د پخلي سر بېره وويل چې په هغه الوتکه کې هیڅ داسې څه نه و چې سوریې يې ادعا کړې.

د سوریې او ترکيې تر منځ اړیکې، په زور د سوريې الوتکې له کوزولو وړاندې لا مخ په خرابېدو وې.

تر هغه وړاندې د ماشومانو په ګډون پنځه ترکي وګړي د هاوان په هغه پېښه کې ووژل شول چې له سوريې توغول شوی و.

د هاوان هغې پېښې ترکي چارواکې غصه کړل او هماغه و چې ترکيې هم په سوریه کې دننه هدفونه وويشتل.

د دې تر څنګ د دواړو ګاونډیو تر منځ د اړيکو خرابېدو ته په کتو ترکيې له سوريې سره پر خپله پوله سرتېري هم ځای پر ځای کړل.

د ترکيې دولت په سوريه کې، په روان تاوتریخوالي کې د حکومت مخالفو ملاتړ کړی او د ولسمشر بشرالاسد د ګوښه کېدو غوښتنه يې کړې ده.

د سوريې د ولسمشر اسد حکومت ترکیه، سعودي او قطر د حکومت مخالفو جنګیالیو سره په پوځي مرستې تورنوي.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .