سعودي پاچا افغان سولې سره د همکارۍ ډاډ ورکړ

د خپريدو وخت: 11:17 گرینویچ - شنبه‬ 27 اکتوبر 2012 - 06 لړم 1391

په افغانستان کې د سولې له بهير سره د سعودي همکاري د ډېرو په گومان خورا مهمه او کاري ده.

د سعودي پاچا عبدالله د لوى اختر په لومړۍ ورځ د افغانستان د فارياب ولايت په مرکز ميمنه کې ځانمرگى بريد غندلى او له افغانستان سره يې په بېلا بېلو برخو په ځانګړي ډول د سولې د را وستو په لاره کې د خپل هېواد د همکاريو ډاډ ورکړى دى.

پاچا عبدالله دا ډاډ گېرنه د جمعى په ورځ ماښام (اکتوبر/۲۶ مه) مهال د افغانستان ولسمشر حامد کرزي ته د ټیلیفوني اړیکې له لارې ورکړه.

په کابل کې د ولسمشرى دفتر وايي په دې اړيکه کې ولسمشر حامد کرزي، د سعودي پاچا او د الحرمین الشریفین خادم د نړۍ د مسلمانانو یو خدمتګار مشر وباله او د اسلامي امت د یو والي په لاره کې یې د هغه له هڅو مننه او قدرداني وکړه.

په کابل کې د ولسمشرۍ دفتر وايي ملک عبدالله له حامد کرزي سره په خبرو کې ډاډ ورکړى چې هېواد به یې له افغانستان سره په بېلا بېلو برخو په ځانګړي ډول د سولې د را وستلو په لاره کې خپلو همکاریو ته دوام ورکړي.

په افغانستان کې د سولې له بهير سره د سعودي همکاري د ډېرو په گومان خورا مهمه او کاري ده.

سعودي يو له هغو دريو هېوادونو و چې د طالبانو حکومت يې په رسميت پېژندلى و او نژدې اړيکي يې ورسره لرلې.

رياض له اسلام اباد سره هم خورا خوږې اړيکي لري چى د ډېرو په گومان پر طالبانو فشار را وستلى شي.

په دې اړه نور مطالب

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .