ختیځه امریکا کې د سنډي توپان له څپو سره سېلابونه یوځای شول

د خپريدو وخت: 06:00 گرینویچ - سه شنبه 30 اکتوبر 2012 - 09 لړم 1391

د نیویارک ښاروال مایکل بلومبیرګ ویلي، د اوبو څپو د تمو ډېرې لوړې دي.

د سنډې توپان څپې د امریکا متحدو ایالتونو ختيځو ساحلي سیمو ته رسېدلې، چې ورسره د سختو بادونو او بارانونو له کبله لږترلږه ۱۵ کسان وژل شوي دي.

په واشنګټن کې خبریالان وايي، چې د نیویارک، لونګ ایلانډ او نیوجرسي واټونو کې اوبه راغلې دي.

تلوېزیوني انځورونه ښيي چې په یادو ښارونو کې د اورګاډو د تګ راتګ او د ګاډو چارې په پټه درېدلې دي.

فرانس پرېس خبري اژانس ویلي، چې په کاناډا او امریکا کې ددغه توپان څپو لږترلږه ۱۳ کسان وژلي.

د نیویارک، نیوجرسي، پنسلوانیا، ویرجینیا او شمالي کارولینا د ایالتونو د چارواکو له خولو ویل شوي، چې په تېره دوشنبه د سنډي توپان څپو ۱۲ کسان وژلي.

خو د کاناډا د تورنټو ښار پولیس وايي، چې یوه ښځه بادونو پسې اخیستې او په اوبو کې یې وژلې ده.

د نیویارک ښاروال مایکل بلومبیرګ ویلي، د اوبو څپو د تمو ډېرې لوړې دي.

بلومبیرګ یوه خبري کنفرانس ته وویل، په منهاټن کې د اوبو څپو نژدې ۲۵۰ زره کورونه ویجاړ کړي، ځکه چې هلته کرۍ شپه برېښنا نه وه، چې ښايي د سې شنبې تر ګهيځ ناوخته دا لړۍ دوام ومومي.

د ختيځې امریکا په ساحلي سیمو کې له برېښنا شاوخوا ۲.۸ میلیونه کسان بې برخې شوي دي.

سېلابونه

اوباما

ولسمشر بارک اوباما پر امریکایانو غږ وکړ، چې د سنډي توپان جدي ونیسي.

سنډي توپان اوس له سمندري توپان وتلی او وچې ته ننوتی دي، چې په یوه ساعت کې د ۸۵ میله تېز باد لړۍ هم ورسره ملګرې شوې ده.

د بادونو د ارزونې ملي امریکايي مرکز ویلي، اتلانتیک ښار ته نژدې سیمه هم سختو بادونو او شړقنده باراونو زیانمنه کړې ده.

د نیویارک، لانګ ایلانډ او نیو جرسي واټونه او سړکونه هم اوبو پسې اخیستې دي.

روان توپان په امریکا کې نژدې ۵۰ میلیون کسان اغېزمن کړي، سلګونه زره کورونه خالي شوي، د نژدې یو میلیون کسانو برېښنا پرې شوې ده.

د امریکا د بېړنیو حالاتو ځینو ادارو ویلي، چې د توپان له کبله په ساحلي ختیځو ښارونو کې زرګونه هوايي الوتنې درېدلې، او د عامه لېږدونې چارې په ټپه ولاړې دي.

ولسمشر بارک اوباما پر امریکایانو غږ وکړ، چې د سنډي توپان جدي ونیسي.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .