سوریې پر خپلې پلازمېنې هم بمباري وکړه

د خپريدو وخت: 10:22 گرینویچ - چارشنبه 31 اکتوبر 2012 - 10 لړم 1391

مخالف ياغيان پر مخ تللي وسلې نه لري چې د حکومتي ځواکونو هوايي ځواک وننگوي.

د سوريې د هوايي ځواک جېټ الوتکو او پوځي چورلکو د هېواد په ډېرو برخو کې د ياغيانو پرضد گوازارونه کړي دي چې په دې کې د دمشق ځينې سيمې هم راځي.

په همدې حال کې د سوريې د هوايي ځواکونو يو جنرال اعدام شوى دى.

د سورېې د حکومت مخالف فعالين وايي د گډودۍ او وېرې صحنه وروسته ترهغه رامنځ ته شوه چې د ژغورنې مرستندويه کارکونکو د حکومت د جنگي الوتکو په بمبارۍ کې د يوې ويجاړې شوې ودانۍ له خاورو او خښتو نه د يوه کوچيني ماشوم ژوبل شوى مړى را ويست.

د مخالفو فعالينو له خوا په اخيستل شوي يوه فلم کې لږ تر لږه د ٥ کوچينيانو مړي وښودل شول چې وايي په دغه بريد کې وژل شوي دي.

دغه پېښه د ادليب په ښار کې رامنځ ته شوې چې له ستراتيژيک پلوه خورا مهم ښار گنل کېږي ځکه چې د دو لويو ښارونو لکه دمشق او حلب تر منځ لويه لار د همدې ښار په منځ کې تېرېږي چې اوس د ياغيانو تر ولکې لاندې راغلې ده.

حکومت له همدې کبله هلته سختې بمبارۍ کوي چې بيه ېې ملکي وگړي پري کوي.

د بشار الاسد د رژيم هوايي ځواک په دې وروستيو اونيو کې خورا مهم رول لوبولى او د حمص او حلب د ښارونو په گډون ېې د دمشق په ختيځ او شاوخوا سيمو کې د مخالفينو پر هدفونو هوايي بريدونه زيات کړي دي.

مخالف ياغيان پر مخ تللي وسلې نه لري چې د حکومتي ځواکونو هوايي ځواک وننگوي.

هاخوا د سورېې دولتي تلوېزیون وايي د هغه هېواد د هوايي ځواکونو يو جگپوړى جنرال د حکومت د مخالفو ياغيانو له خوا وژل شوى دى.

جنرال عبدالله محمود الخالدي پرون (اکتوبر/ ۳۰ مه) د پلازمېنې دمشق د رکن الدين په سيمه کې په گوليو ووژل شو.

د ازادې سورېې پوځ وايي د هوايي ځواکونو دغه جنرال دوى وژلى دى.

داسې باور کېږي چې عبدالله الخالدي د دمشق په شمال کې د نامالومو وسله والو په بريد کې هغه مهال ووژل شو چې د خپل دوست له کوره را ووت.

له بلې خوا د سورېې لپاره د ملگرو ملتونو او عربي هېوادونو ځانگړى استازى الأخضر الإبراهيمي په چين کې دى چې د سورېې د لانجې د غوڅولو پر سر له هغه هېواد سره د سوریې ريژيم يو تر ټولو مهم ملگرى بلل کېږي يو گډ سياسي تفاهم ته ورسېږي.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .