د سنډي توپان له امله د وژل شويو شمېر ۹۰ ته رسېدلی

د خپريدو وخت: 05:12 گرینویچ - جمعه 02 نومبر 2012 - 12 لړم 1391
سنډي توپان

د تازه اټکل له مخې د توپان د زيان کچه ۵۰ ميليارده ډالره تخمين شوې چې د پخواني اټکل دوه برابره ده.

د امريکا په شمال ختيځ کې د سنډي توپان په پايله کې د وژل شويو شمېر ۹۰ کسانو ته رسېدلی او د دغې شمېرې د زياتوالي وېره شته ده.

د دغه څو ورځني توپان له امله د وژل شويو ۳۸ تنه يې د نيويارک ښار دي او ډېر نور لا تري تم دي.

له توپان وروسته اوس د ترانسپورت، روغتيا، برېښنا او اوبو د سيستمونو پر بيا فعالېدو کار روان دی، خو لا هم د امريکا په ۱۲ ایالتونو کې ميليونونه کسان برېښنا نه لري او د سون توکو له کمښت سره مخامخ دي.

د ملي ګارد ځواکونه د نيويارک د اوسېدو سيمو ته په پاکټونو کې پخه ډوډۍ او د څښلو د پاکو اوبو بوتلونه وروړي.

د ژغورنې کارکوونکي اوس د ځپل شويو سيمو په ځانګړي ډول د سټېټن په ټاپو کې کور په کور پلټنې کوي.

د نيويارک له دغې جنوب لوېدېځې سيمې تر اوسه لږ تر لږه د ۱۵ کسانو جسدونه ترلاسه شوي دي.

د سټېټن په ټاپو کې هغه کورونه چې په ټيټه کې پراته وو سمندري توپان په کې لويه تباهي رامنځته کړې او کورونه يې له بېخه چپه کړي دي.

د تازه اټکل له مخې د توپان له امله د اووښتي زيان کچه ۵۰ ميليارده ډالره تخمين شوې چې د پخواني اټکل دوه برابره ده.

د نيويارک په ښار او نيو جرسي ايالت کې اوس هم د تيلو زيات پمپ سټېشنونه بند دي او هغه چې پرانستي دي، خلک ورته په اوږدو ليکو کې ولاړ دي.

د نيويارک پر سړکونو د ګڼې ګوڼې د کمېدو لپاره خلکو ته په اورګاډو او بسونو کې د مفته سفر اسانتياوې برابرې شوي دي.

تمه ده چې د نيويارک ډېرې سيمې د شنبې تر ورځې بېرته عادي حالت ته ور وګرځي، خو د يو شمېر سيمو پاکول ښايي څو اوونۍ وخت ونیسي.

په دې اړه نور مطالب

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .