اوباما: غمیزې نورې نه شو زغملای

د خپريدو وخت: 10:18 گرینویچ - دوشنبه 17 ډسمبر 2012 - 27 لیندۍ 1391

ولسمشر بارک اوباما وايي د تېرې جمعې د ورځې په څېر غمیزو د پائ ته رسولو په خاطر امریکا باید بدله شي.

د امریکا ولسمشر بارک اوباما ژمنه کړې چې خپل ټول وس به وکړي چې په کونېکټيکټ ایالت کې د تېرې جمعې د ورځې په څېر پېښه چې یوه وسله وال په کې ماشومان ووژل، بیا تکرار نه شي.

ولسمشر اوباما د کونېکټيکټ ایالت په نیوټاون ښار کې د وینا پرمهال وویل، د تېرې جمعې د ورځې په څېر غمیزو د پای ته رسولو په خاطر امریکا باید بدله شي.

ولسمشر بارک اوباما دغه څرګندونې هغو خلکو ته کولې، چې په نیوټاون کې د هغو ۲۰ ماشومانو او شپږو لویانو ویر ته ټول شوي وو چې د یوه ۲۰ کلن وسله وال له خوا په ډزو ووژل شول.

د امریکا ولسمشر په خپل هېواد کې د وسلو د لرلو په قانون کې بدلون ته په اشارې زیاته کړه چې د جمعې د ورځې د غمیزې په شان د نورو پېښو د مخنیوي لپاره به تر خپله وسه هلې ځلې وکړي.

هغه وویل دغه ډول بله غمیزه نه شو زغملای.

دې ډول پیښو ته باید د پای ټکی کېښودل شي او د دې لپاره باید موږ په امریکا کې بدلون رامنځ ته کړو.

ولسمشر اوباما ویر کوونکو ته وویل تاسو په دې غم کې یوازې نه یاست، بلکې د هېواد ټولو خلکو په دې غم کې اوښکې تویې کړې دي.

د پېښې قربانیان

ټول وژل شوي ماشومان د شپږو او اوو کلونو ترمنځ عمرونه لري.

اته یې هلکان او شپږ نور یې نجونې دي.

دغه راز ټول وژل شوي لویان ښځې دي.

په پام کې ده چې د جمعې د ورځې د پېښې د قربانیانو له ډلې د لومړي کس د جنازې مراسم نن دوشنبه ترسره شي.

ټول وژل شوي ماشومان او لویان څو څو ځلې د وسله وال اډم لینزا له خوا په ډزو ویشتل شوي دي.

اډم لینزا مخکې له هغه چې د سنډي هوک په نامه لومړني ښوونځي ته ولاړ شي، خپله مور چې په همدې ښوونځي کې ښوونکې وه، وژلې وه.

په دې اړه نور مطالب

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .