هند: د ډله ییز جنسي تېري ضد احتجاج دوام لري

د خپريدو وخت: 08:00 گرینویچ - دوشنبه 24 ډسمبر 2012 - 04 مرغومی 1391

د تېرې اوونۍ په پای کې د همدې احتجاجونو په لړ کې نژدې ۱۰۰ کسان ټبیان شول، خو ځايي پولیسو د ۷۰ کسانو ټپي کېدل تایید کړل.

د هند لومړي وزیر منموهن سنګهـ د خپل هېواد په پلازمېنه ډیلي کې پر یوې نجلۍ د ډله ییز جنسي تېري له امله د پاریدلو خلکو له احتجاج وروسته له خلکو غوښتي، چې له تشدد کولو ډډه وکړي.

د تېرې یکشنبې په ورځ په نوي ډیلي کې په یوه روان بس ګاډي کې پر یوې ۲۳ کلنې نجلۍ ډله ییز تېری شوی و، چې له امله د هند په لر او بر کې سخته غوسه راوپارېده.

له تېرې یوې اوونۍ راهیسې په دغه هېواد کې د احتجاجونو لړۍ دوام لري.

د تېرې اوونۍ په پای کې د همدې احتجاجونو په لړ کې نژدې ۱۰۰ کسان ټبیان شول، خو ځايي پولیسو د ۷۰ کسانو ټپي کېدل تایید کړل.

د دوشنبې په ورځ په یوه لنډه ټیلویزیونې بیانیه کې لومړي وزیر منموهن سنګهـ وویل" زه له ټولو هېواد والو غوښتنه کوم، چې د امنیت په ټینګښت کې برخه واخلي، زه تاسې ته ډاډ درکوم، چې حکومت به په دغه هېواد کې د ښځو د خوندیتوب لپاره ټول ممکن اقدامات وکړي."

د نوموړي په وینا" زه هم د درې لوڼو پلار یم او د دې موضوع په اړه د خپل ولس په څېر سخت په غوسه یم، د خلکو غوسه پر ځای ده، خو غوسه کول د هیڅ ستونزې په حل کې مرسته نه کوي."

د یکشنبې په ورځ هم د لومړي وزیر له خوا یوه بیانیه جاري شوه، چې په کې د نوموړي له خوا ویل شوي و، هغه د پولیسو او احتجاج کوونکو تر منځ د اخ و ډب له امله د یو شمېر کسانو په ټپي کېدو خواشینی دی.

په بیانیه کې دا هم وویل شول" موږ ټول د هغې نجلۍ په اړه اندېښمن یو، چې په ډیلي کې د یوه ناوړه جرم ښکار شوه او په دې اړه د ولس خواشیني او غوسه پر ځای دي."

"زه هم د درې لوڼو پلار یم او د دې موضوع په اړه د خپل ولس په څېر سخت په غوسه یم، د خلکو غوسه پر ځای ده، خو غوسه کول د هیڅ ستونزې په حل کې مرسته نه کوي."

منموهن سنګهـ

د شنبې او یکشنبې ورځو په اوږدو کې زرګونه کسان په ډیلي کې د انډیا ګېټ سیمې ته ورغلل او د پېښې د عاملینو لپاره یې د سختې سزا غوښتنه وکړه.

یو شمېر احتجاج کوونکو ویل د حکومت دا ژمنه، چې مجرمانو ته به د عمري زندان سزا ورکړي، بسنه نه کوي، دوی د پېښې د مجرمانو لپاره د مرګ د سزا غوښتنه کوله.

له هغه وروسته دغه احتجاج په تشدد او اخ وډب واوښت، چې په بهیر کې یې د وراني ویجاړي او اور اچونې پېښې هم وشوې.

د دوشنبې په ورځ د ډیلي ښار چارواکو د ښار په مرکزي برخو کې یو د میټرو ریل ګاډي یو شمېر تم ځایونه هم وتړل.

د دوی په وینا دا کار یې د ډیلي پولیسو په لارښوونه کړی.

ځايي چارواکو په ډیلي ښار کې د ښځو د خوندیتوب لپاره یو شمېر ګامونه پورته کړي، چې په دې لړ کې شپې مهال د پولیسو ګزمې زیاتول، د بسونو د چلوونکو څارنه او د بسونو پر هندارو د پردو ځوړندولو منع کول شامل دي.

بل لور ته ډاکټرانو ویلي، چې د زیادتي ښکار نجلۍ روغتیايي حالت اوس هم ښه نه دی. د یادې نجلۍ پلار هم د مجرمانو لپاره د مرګ د سزا غوښتنه کوي.

په دې اړه نور مطالب

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .