هند: پنځه سړي په ډله ییز جنسي تېري تورن شوي

د خپريدو وخت: 10:35 گرینویچ - پنجشنبه 03 جنوري 2013 - 14 مرغومی 1391

اټکل نه کېږي، چې تورن کسان دې د امنیتي دلایلو له کبله پخپله په محکمه کې حاضر شي.

په هند کې پنځه سړي د هغې ښځې پر مرګ په رسمي ډول تورن شوي، چې تېره میاشت پرې د ډیلي په یوه بس کې ډله ییز جنسي تېری شوی و.

دغه برید په هند کې په ملي کچه د خلکو غوسه راپارولې وه. پولیس به په پلازمېنې کې د دغو تورونو جزیات محکمې ته وړاندې کړي.

اټکل نه کېږي، چې تورن کسان دې د امنیتي دلایلو له کبله پخپله په محکمه کې حاضر شي.

که پر دوی دغه تورونه ثابت شي، د مرګ له سزا سره مخ کېدای شي.

د پېښې ۲۳ کلنه قرباني شوې مېرمن چې نوم یې نه دی اخېستل شوی، د جمعې پر ورځ د برید پر مهال د سختو ټپونو له کبله مړه شوه.

پولیسو په دې قضیه کې شپږ کسان نیولي، چې د بس ګاډي چلوونکی هم په کې شامل دی.

"ویل کېږي، له پنځو تورنو سره سره په دې قضیه کې د ښکېل شپږم کس عمر له ۱۸ کلونو کم دی او پولیس یې د بلوغت معلومولو لپاره طبي څېړنه کړې، چې د پایلو تر راتګه به یې نوموړی تورن نه پېژندل کېږي."

ویل کېږي، له پنځو تورنو سره سره په دې قضیه کې د ښکېل شپږم کس عمر له ۱۸ کلونو کم دی او پولیس یې د بلوغت معلومولو لپاره طبي څېړنه کړې، چې د پایلو تر راتګه به یې نوموړی تورن نه پېژندل کېږي.

له دې مخکې پي ټي ای خبري اژانس د پولیس چارواکو له قوله ویلي و، چې د پېښې پر شپه تېري کوونکو پر وژل شوې نجلۍ له جنسي تېري وروسته هغه په اوسپنیزو کوتکو ووهله او له بس نه یې بهر ته وغورځوله.

د پولیس په وینا بهر ته له غورځولو وروسته تېري کوونکو هڅه وکړه، چې هغه په ګاډي ووهي، خو د نجلۍ ملګري هغه وژغورله.

حکومت ژمنه کړې، چې جنسي تېري کوونکو ته به سختې سزاګانې وټاکي. هندیانو د سترو مظاهرو په ترڅ کې په اوسني قانون کې د بدلونونو غوښتنه کړې ده.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .