مالي کې یاغیان له نیول شوي ښاره ووتل

د خپريدو وخت: 07:37 گرینویچ - شنبه‬ 12 جنوري 2013 - 23 مرغومی 1391

مالي کې وسله والو ډلو د تېر کال په اپریل کې د دغه هېواد د شمالي سیمو واک تر لاسه کړ. دې ډلو کې یو شمېر یې له القاعده سره تړاو لري.

افریقا يي هېواد مالي کې امنیتي ځواکونه وايي د فرانسوي پوځ له هوايي بریدونو وروسته له دفاعي لحاظه مهم ښار کوونا د اسلامي سخت دریځو له ولکې ایستل شوی دی.

ځايي امنیتي مقاماتو ویلي، چې یاغیانو یوه ورځ مخکې په دغه ښار ولکه ټینګه کړې وه، خو اوس هغوی د جنوب لور ته شړل شوي دي.

له دې رپوټونه څو ساعته مخکې د فرانسې ولسمشر فرانسوا اولاند ویلي و، چې د مالي له پوځ سره د مرستې لپاره پوځي عملیات پیل شوي دي.

مالي کې وسله والو ډلو د تېر کال په اپریل کې د دغه هېواد د شمالي سیمو واک تر لاسه کړ. دې ډلو کې یو شمېر یې له القاعده سره تړاو لري.

دغه سخت دریځې ډلې سیمه کې سخت اسلامي قانون پلي کول غواړي. د سیمې هېوادونو او لوېدیځوالو د اسلامي سخت دریځو ډلو د ګواښونو په اړه اندېښنه څرګنده کړې.

د فرانسې ولسمشر فرانسوا اولاند د مالي له پوځ سره د مرستې لپاره د خپل پوځي فعالیت د پیل له اعلان سره هم مهاله وویل، چې سخت دریځي غواړي مالي څخه یو ترهګر هېواد جوړ کړي.

د نوموړي په وینا، مالي کې پوځي مداخله له نړیوالو قوانینو سره سمه ده او د مالي موقت ولسمشر ډانکونډا ټران اورې په دې اړه رضایت څرګند کړی. د نوموړي په خبره دغه کار به د اړتیا پوره کېدو تر مهاله دوام وکړي.

د فرانسې چارواکو مالي کې د پوځي فعالیت په اړه ډېر لږ معلومات ورکړي، خو د فرانسې د بهرنیو چارو وزیر مالي کې د هوايي ځواک کارول تایید کړي.

بل لور ته د مالي ولسمشر په خپل هېواد کې بېړنیز حالت اعلان کړی. د نوموړي په خبره دغه حالت به په لومړنۍ توګه تر ۱۰ ورځو پورې دوام وکړي.

"د برتانیا حکومت مالي کې د فرانسوي پوځ د فعالیت ملاتړ کړی او د امریکا متحده ایالاتو ویلي، چې فرانسې ته د استخباراتي او لوژستیکي مرستو په رسولو غور کوي."

کوونا ښار ته نژدې د موپټي ښار اوسېدونکو بي بي سي ته ویلي، چې فرانسوي پوځیان يې په داسې حال کې لیدلي، چې د مالي له پوځ سره یې مرسته کوله، چې هغوی پر اسلامپاله سخت دریځو ځوابي بریدونه وکړي.

د برتانیا حکومت مالي کې د فرانسوي پوځ د فعالیت ملاتړ کړی او د امریکا متحده ایالاتو ویلي، چې فرانسې ته د استخباراتي او لوژستیکي مرستو په رسولو غور کوي.

له دې مخکې ملګرو د ستونزې لپاره د سیاسي حل نه موندل کېدو په صورت کې سیمې ته درې زره افریقايي پوځیانو لېږل تصویب کړي وو، خو دغه پوځه مداخله له سپتمبر میاشتې مخکې ناممکنه وه.

د فرانسې د بهرنیو چارو وزیر ویلي، چې د پوځي مداخلې هدف د سخت دریځو د پرمختګ مخنیوی کول دي. د مالي شمالي سیمه کې اووه کسه فرانسویان یرغمل نیول شوي او فرانسوي چارواکو ویلي، چې د یرغمل کسانو د ژغورلو لپاره به هر ممکن اقدام وکړي.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .