د الجزاير يرغمل نيونې پېښه په وژنو پای ته رسېدلې

د خپريدو وخت: 14:28 گرینویچ - شنبه‬ 19 جنوري 2013 - 30 مرغومی 1391

د الجزاير ختيځ کې له تېرې پنجشنبې/زيارت راهيسې د يرغمل نيونې دغه پېښه روانه وه

د الجزاير ځواکونو د دغه هېواد ختيځ صحرا کې د غازو پر بټۍ وروستۍ چاپه کې ۱۱ تنه يرغمل نيوونکي وژلي دي.

د الجزاير دولتي خبري اېجنسۍ ويلي ۷ تنه يرغمل په داسې حال کې چې ځواکونو يې د ازادولو هڅه کوله د خپل نيوونکيو له لوري په بيړنۍ توګه وژل شوي دي.

د وژل شويو يرغملو تابعيت لا تر اوسه نه دی په ډاګه شوی.

اورپکي له تېرې پنجشنبې/زيارت راهيسې د يرغمل نيونې دغه پېښه کې ښکېل وو، چې هڅه يې کوله له ليبيا سره پولې ته نژدې د الجزاير غازو پر دغه لرې پروت ځای ولکه ټينګه کړي.

له دې وړاندې د موريتانيا خبري اېجنسۍ راپور ورکړی و، يوه تښتوونکي د غازو بټۍ په يوه کونج کې ۷ تنه نيولي وو، او ګوتڅنډنه يې کړې وه که يې د خوشي کولو کومه هڅه وشوه، د غازو بټۍ ودانۍ به والوځوي.

په نړيواله کچه له الجزاير غوښتنې کېدې چې د يرغمل شويو خونديتوب ډاډمن کړي.

فرانسې او امريکا دواړو د دې پخلی کړی چې د دوی يو يو وګړی وژل شوي دي.

د الجزاير دولتي خبري اېجنسۍ ويلي له هغه راهيسې چې د ژغورنې هڅې پيل شوې ۱۲ تنه الجزايري او بهرني کارکوونکي وژل شوي دي.

لا تر اوسه د ۳۰ تنه بهرنيانو برخليک نه دی معلوم شوی، چې څه کم لس تنه يې بريتانويان دي.

اورپکيو په خپله له چاپې مخکې ويلي وو، چې ۷ تنه يرغمل ورسره دي.

له هغه لږ مخکې چې د وروستۍ چاپې راپورونه رابرسېره شول، د يرغمل نيونکيو مشر، عبد الرحمن النيجري وويل حکومت بايد له دوو يوه لاره غوره کړي يا دې له تښتوونکيو سره خبرې وکړي، او يا دې د ير غمل شويو مرګ ته په تمه شي.

د "ان اميناس" غازو ايستلو بټۍ د "ان اميناس" ښارګوټي جنوب لوېديځ ۴۰ کيلومترۍ په ټيګتنټورين سيمه کې پرته ده، چې له پلازمېنې الجزيرې نه ۱۳۰۰ کيلومتره واټن لري.

دغه بټۍ د بي پي (برېټېش پېټروليم)، د ناروې سټاټ اويل او د الجزاير د تېلو دولتي شرکت له لوري په ګډه چلول کېږي.

په دې اړه نور مطالب

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .