مالي ځواکونو 'کونا' ښار له یاغیانو بېرته نیولی

د خپريدو وخت: 04:27 گرینویچ - شنبه‬ 19 جنوري 2013 - 30 مرغومی 1391

د مالي یوه پوځي قوماندان ډګروال ډیډار ډاکویو ملي تلویزیون ته ویلي چې کله د دوی ځواکونه د کونا ښارګوټي ته ورغلل نو خلکو یې تود هرکلي وکړ.

د مالي پوځ وايي د 'دیابالي' او کونا ښارونه یې بېرته له یاغیانو نیولي دي.

دغه ښارونه د روانې میاشتې په لومړیو کې د اسلام پالو ځواکونو له خوا نیول شوي وو، خو د فرانسوي ځواکونو د هوايي بمباریو په پایله کې اسلام پاله ځواکونه له دغو دوو مرکزي ښارونو په شا شوي دي.

د مالي یوه پوځي قوماندان ډګروال ډیډار ډاکویو ملي تلویزیون ته ویلي چې کله د دوی ځواکونه د کونا ښارګوټي ته ورغلل نو خلکو یې تود هرکلي وکړ:

''د څلور او پنځو بجو ترمنځ زموږ ځواکونو د کونا ښارګوټی ونیو. اوس هم په دغه ښارګوټي او شاخوا سیمه کې عملیات دوام لري. کله چې موږ کونا ته ورغلو خلکو زموږ ښه هرکلی وکړ، موږ ډېر خوشحاله یو. د خلکو له هرکلي نه د فرانسوي ځواکونو قطعه هم خوښه وه.''

په همدې حال کې د ملګرو ملتونو د کډوالو د چارو اداره وايي د مالي له شمالي سیمو یې د یاغیانو له خوا د سرغړونو بوږنونکي رپوټونه ترلاسه کړي دي.

اعدام

د مالي نه بي ځایه شویو کډوالو ویلي چې یاغیانو خلک اعدامول، د بدن غړي یې ورپرې کول او د هغوی ماشومان یې جګړې ته بېول.

د ملګرو ملتونو د کډوالو د چارو اداره اټکل کوي چې په مالي کې د جګړې له امله به ۷ سوو زره نور کسان هم د خپلو مېنو پرېښودلو ته اړ شي.

دا په داسې حال کې ده چې ۱۵۰۰۰۰ (یو لک او پنځوس) زره کسان وار د مخه ګاونډیو هېوادونو ته کډه شوي او درې سوه زره کسان په خپله مالي کې بي ځایه شوي دي.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .