ګډه مرکه کې باراک اوباما هیلري کلینټن وستایله

د خپريدو وخت: 09:59 گرینویچ - دوشنبه 28 جنوري 2013 - 09 سلواغه 1391

د اوباما په وینا د مېرمن کلینټن فکر، ژمنتیا او د کار کولو څرنګوالی ورته د تایید وړ دي.

د امریکا د متحده ایالاتو ولسمشر باراک اوباما ویلي، چې د هیلري کلینټن نوم به د امریکا د بهرنیو چارو د غوره وزیرې په توګه یادیږي.

ویل کېږي، هیلري کلنټن د بهرنیو چارو د وزیري په توګه په لنډه موده کې دنده پرېږدي او پر ځای به یي د سناتور جان کیري ټاکنه تایید شي.

سي بي ایس ټلویزیون سره د یوې ګډې مرکې پر مهال ولسمشر اوباما د مېرمن کلینټن ستاینه وکړه او ویې ویل، چې د بهرنیو چارو د وزیرې په توګه نوموړې مهم رول ترسره کړ. د اوباما په وینا:

"د مېرمن کلینټن فکر، ژمنتیا او د کار کولو څرنګوالی ورته د تایید وړ دي."

خو د مرکې پر مهال، په ۲۰۱۶ کال کې د ولسمشرۍ لپاره د مېرمن کلینټن د کاندید کېدو په اړه د پوښتنې ځواب ته دواړو څه ونه ویل.

د ۲۰۰۸ کال په ولسمشریزو ټاکنو کې مېرمن کلینټن د دیموکرات ګوند له لوري کاندیده وه، خو باراک او باما د ګوندي ټاکنو پر مهال بریالی شو.

له هغه وروسته ولسمشر اوباما په خپله کابینه کې هغه د بهرنیو چارو د وزیرې په توګه وګومارله. له سي بي ایس ټلویزیون سره په مرکه کې ولسمشر اوباما وویل، چې له مېرمن کلینټن سره څلور کاله ګډ کار کول د ده لپاره غوره تجربه وه.

"زه او ولسمشر اوباما د خپل هېواد د راتلونکي په اړه جدي فکر کوو."

مېرمن کلینټن

د نوموړي په وینا " هغه به مې ډېره یادیږي، کاش، چې څه نوره موده هم له موږ سره وای"

واشنګټن کې د بي بي سي خبریاله جین لټل وايي داسې ګومان کېږي، چې د دې مرکې په ترڅ کې داسې اشارې وشوې، چې ګواکې مېرمن کلینټن به د ۲۰۱۶ کال ولسمشریزو ټاکنو ته د کاندیدې په توګه وړاندې شي.

زموږ د خبریالې په وینا په دې اړه دواړو انکار و نه کړ. په ورته مهال مېرمن کلینټن وویل:

"زه او ولسمشر اوباما د خپل هېواد د راتلونکي په اړه جدي فکر کوو."

دغه مرکه د جمعې په ورځ ثبت شوې وه او د یکشنبې په ورځ خپره شوه.

په دې اړه نور مطالب

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .