عربي اماراتو کې ۹۴ کسان محاکمه کېږي

د خپريدو وخت: 07:28 گرینویچ - دوشنبه 28 جنوري 2013 - 09 سلواغه 1391

متحده عربي اماراتو کې پر سیاسي ګوندونو او سیاسي غونډو بندیزونه لګېدلي.

د متحده عربي اماراتو چارواکو د دغه هېواد پر واکمنۍ د ولکې ټینګولو په تور د ۹۴ کسانو د محاکمې امر کړی.

د دغه هېواد لوی څارنوال سلیم سعید قوبایش ویلي دې کسانو یوه پټه ډله جوړه کړې وه، چې په ظاهره یي ولس کې د اسلامي احکامو د تطبیق لپاره تبلیغ کاوه، خو اصلاً دې کسانو غوښتل حکومت نسکور کړي.

د لوی څارنوال له لوري خپره شوې بیانیه کې ویل شوي، چې دې کسانو د حکومت پر ضد د خلکو د لمسولو لپاره رسنۍ او ټولنیزې ویبپاڼې کارولې.

په بیانیه کې دغه راز ویل شوي، چې دې کسانو د متحده عربي اماراتو د حکومت د بنسټیزو اصولو سره د مخالفت او پر واک د قبضې لپاره یوه اداره جوړه کړه او د دې ادارې چارې يي پر مخ بیولې.

په بیانیه کې ویل شوي، چې دې کسانو د ځمکو د کاروبار او د مذهب په نوم د بسپنې له لارې پېسې تر لاسه کولې.

"تېر کال چارواکو تر ۶۰ ډېر خیریه کارکوونکي کسان نیولي وو، چې ډېر یي د الاصلاح سازمان اړوند وو."

د لوی څارنوال په بیانیه کې راغلي، چې دغې ډلې د اخوان المسلمین په شمول له یو شمېر بهرنیو کسانو سره اړیکې درلودې.

تېر کال چارواکو تر ۶۰ ډېر خیریه کارکوونکي کسان نیولي وو، چې ډېر یي د الاصلاح سازمان اړوند وو.

پر الاصلاح تنظیم داسې شکونه کېږي، چې ګواکې له اخوان المسلمین سره اړیکې لري.

د الاصلاح په وینا دوی د سوله ییزو اصلاحاتو غوښتونکي دي او له نړیوال اخوان المسلمون سره هېڅ ډول اړیکي نه لري.

په متحده عربي اماراتو کې پر سیاسي ګوندونو او سیاسي غونډو بندیزونه لګېدلي.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .