سوري اپوزېسیون خپله پرېکړه کې بدلون راوستی

د خپريدو وخت: 06:06 گرینویچ - سه شنبه 26 فبروري 2013 - 08 کب 1391

د سوریې د ملي ايیتلاف مشر معاذ الخطیب د اټالیا په روم ښار کې رابلل شوې غونډې کې د ګډون اعلان کړی.

سوریه کې اپوزېسیون ګوندونو خپله هغه پرېکړه بدله کړې، چې ګواکې دغه هېواد کې به د سولې ټینګښت لپاره په نړیوالو غونډو کې ګډون نه کوي.

د سوریې د ملي ايیتلاف مشر معاذ الخطیب د ایټالیا په روم ښار کې رابلل شوې غونډې کې د ګډون اعلان کړی.

هغه زیاته کړه، دوی ځکه خپله پرېکړه بدله کړه، چې د امریکا متحده ایالتواو برتانیا د بهرنیو چارو وزیرانو د سوریې له خلکو سره د ځانګړو مرستو زیاتولو ژمنه ورسره وکړه.

د سوریې اپوزېسیون اییتلاف په نړیوالو دیپلوماتیکو مذاکراتو کې د ګډون نه کولو پرېکړه، ځکه کړې وه، چې د دوی په وینا نړیواله ټولنه و نه توانېده، په سوریه کې د ټولوژنې مخه ونیسي.

له دې مخکې د دوشنبې په ورځ د امریکا د بهرنیو چارو وزیر جان کېري برتانیا ته د سفر پر مهال ویلي و، چې د سوریې اپوزېسیون باید په هغه غونډه کې ګډون وکړي، چې د پنجشنبې په ورځ روم ته بلل شوې.

د ښاغلي کېري په وینا دی باوري دی، چې د سوریې خلک پایله لرونکي مذاکرات غواړي او دی ژمنه کوي، چې دغه مذاکرات به تشې خبرې نه وي.

د سوریې اپوزېسیون د روسیې لخوا بشارالاسد حکومت ته د سکاډ توغندیو پر ورکړه سخت اعتراض لري.

د دوشنبې په ورځ جان کېري د برتانیا د بهرنیو چارو له وزیر ویلیم هېګ سره له خبرو وروسته د سوریې د اپوزېسیون له مشر معاذالخطیب سره هم ټیلیفون کې وغږید.

له دې اړیکې وروسته د سوریې اپوزېسیون مشر په مذاکراتو کې د ګډون کولو اعلان وکړ.

بل لور ته د سوریې د بهرنیو چارو وزیر ویلي، حکومت یې د وسله والو یاغیانو په ګډون له خپلو ټولو مخالفانو سره خبرو ته چمتو دی. د سوري اپوزېسیون اییتلاف مشر معاذ الخطیب درې اونۍ مخکې په خپل هېواد کې د جګړې ختمولو لپاره له بشارالاسد حکومت سره خبرو ته چمتووالی څرګند کړی و.

د روسیې په ګډون نړیوالو قوتونو د دې هڅو ملاتړ کړی و.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .