عراق: موټر بم چاودنو کې ۶۶ کسان وژل شوي

Image caption تېره اونۍ عراق کې د بریدونو یوه لړۍ کې ۷۰ کسان ووژل شول او یو شمېر نور ټپیان شول.

د عراق پلازمېنه بغداد کې پولیس وايي، شیعه مېشتو سیمو کې د موټر بم چاودنو په نتیجه کې لږ تر لږه ۶۶ کسان وژل شوي دي.

دغه لږ تر لږه ۱۲ موټر بم چاودنې د ښار په مختلفو بازارونو کې شوې، چې یو شمېر کسان په کې ټپیان شوي هم دي.

دا وروستیو کې د عراق بیلو سیمو کې د فرقه ییز تشدد پېښې ډېرې شوې او دا چاودنې هم د دې لړۍ یوه کړۍ بل کېږي.

داسې ویره څرګندیږي، چې د تشدد دغه لړۍ د ۲۰۰۶ او ۲۰۰۷ کلونو کچې ته و نه رسېږي، چې زرګونه کسان په کې وژل شوي وو.

یو بم د بغداد په مرکزي برخه صدون واټ کې وچاودېد. یوه عیني شاهد زین العابدین وویل، چې څلور کلن ماشوم هم د دغه برید په ښکار شویو کسانو کې شامل و.

هغه وپوښتل"دغه خوارکي څه ګناه کړې وه؟ "

د ایسوشیټیډ پریس خبري اژانس رپوټ کې ویل شوي، چې المالف سیمه کې ۶ کسان او حبیبیه سیمه کې ۱۲ کسان د دغه ډول بریدونو شکار شوي.

تر اوسه د دې پېښو مسوولیت چا پر غاړه نه دی اخیستی، خو له تېر کاله راهیسې د سنیانو او شیعه ګانو تر منځ ترینګلتیا ډېره شوې ده.

سنیان د لومړي وزیر نوري المالکي پر حکومت تور پورې کوي، چې له دوی سره تعصب کوي، خو حکومت دا تورونه ردوي.

نوري المالکي هوډ څرګند کړی، چې د عراق د سولې او ثبات تګلارې کې به ژر بدلونونه رامنځ ته کړي.

د نوموړي په وینا " سخت دریځي به و نه توانیږي، چې موږ بېرته د فرقه ییز فساد لور ته بیا ستانه کړي. "

تېره اونۍ عراق کې د بریدونو یوه لړۍ کې ۷۰ کسان ووژل شول او یو شمېر نور ټپیان شول.

دغه پېښې د تېرو څو کلونو په موده کې دغه هېواد کې د تشدد ناوړه پېښې وې. د روانې میاشتې په اوږدو کې عراق کې ۴۵۰ کسان وژل شوي. دا دویمه پرله پسې میاشت ده، چې تشدد پېښو کې دغه هېواد کې له ۴۰۰ ډېر کسان وژل کېږي.

ورته مطالب