روحاني: د یورانیمو بډاینه نه بندوو

Image caption د ایران ولسمشر محدود واک لري او د پالیسۍ اړوند مهمې پرېکړې د دغه هېواد مذهبي مشر ایت الله علي خامنه ای کوي.

د ایران نوي ټاکل شوي ولسمشر حسن روحاني له ټاکنو وروسته لومړۍ خبرې غونډې ته وینا کې وویل، چې هېواد یې چمتو دی، د خپل اټومي پروګرام په باب ډېر شفافیت څرګند کړی، خو وايي، د یورانیم بډاینه به بنده نه کړي.

د نوموړي په وینا دې لړ کې پر ایران لګېدلي بندیزونه عادلانه نه دي.

د ایران ولسمشر محدود واک لري او د پالیسۍ اړوند مهمې پرېکړې د دغه هېواد مذهبي مشر ایت الله علي خامنه ای کوي.

تهران کې خبرې غونډې ته په وینا کې نوموړي وویل:

"زموږ اتومي پروګرام په بشپړه توګه شفاف دی. خو د نور شفافیت څرګندولو لپاره او نړیوالې ټولنې ته د دې ښولو لپاره چمتو یو، چې د ایران د اسلامي جمهوریت ټول اقدامات د نړیوالو قوانینو په چوکاټ کې دننه دي."

نوموړي ټینګار وکړ، چې د یورانیمو بډاینې درولو مخالفت به وکړي، چې د ایران او لوېدیځ تر منځ د اړیکو په وړاندې خنډ دی.

تېره میاشت د ملګرو ملتو د اتومي انرژۍ ادارې مسوولینو ویلي و، چې ایران د نطنز په اتومي کارځای کې سلګونه نوي سنټري فیوجونه ځای پر ځای کړي دي.

د اتومي انرژۍ نړیوالې ادارې د ایران د اتومي پروګرام پر ممکنه پوځي اړخ اندېښنه ښوولې وه.

خو وايي د ۲۰ سلنه بډای یورانیم کچه نه ده زیاته شوې.

لوېدیځ شک لري، چې ایران غواړي اتومي وسله جوړه کړې، خو ایران وايي اټومي پروګرام یې سوله ییز دی.

خبرې غونډې ته د وینا پر مهال ښاغلي روحاني د یو شمېر مسایلو په باب خبرې وکړې، ویې ویل، حکومت یې غواړي له نړۍ سره ( رغنده اړیکي رامنځ ته کړي) نوموړي د "منځلارۍ" ټاکلو لپاره د ایران له خلکو مننه وکړه.

نوموړي له "ولوله ییزو" ایراني ځوانانو مننه وکړه، ویې ویل د ټاکنو پر مهال به خپلې ژمنې هېرې نه کړي.

روحاني تجربه لرونکی سیاستوال دی او د تېرې جمعې ورځې په ټاکنو کې تر ۵۰ سلنه ډېرو رایې تر لاسه کولو د ایران د ولسمشرۍ مقام ته وټاکل شو.

ورته مطالب