هند:طالبانو سره خبرو کې زموږ ګټو ته زیان نه اوړي

Image caption تر اوسه امریکایان هم په بشپړه توګه ډاډه نه دي، چی خبرې به دوام وکړي او که نه. سلمان خورشید

هندوستان وايي، له وسله والو طالبانو سره د امریکا د متحدو ایالتونو خبرې به د هند له لوري ټاکل شویو "سرو کرښو" کې دننه وي.

د جمعې په ورځ د هندوستان د بهرنیو چارو وزیر سلمان خورشید دغه خبرې د هند تر کنټرول لاندې کشمیر کې وکړې.

نوموړي له طالبانو سره خبرو کې د بریالیتوبونو په باب د خپل هېواد اندېښنې په ډاګه کړې.

سرینګر کې د واکمن کانګریس ګوند غونډې ته په وینا کې ښاغلي خورشید وویل، چې افغانستان او متحده ایالتونو ډاډ ورکړی، طالبانو سره خبرو کې به د هندوستان ګټو ته هېڅ زیان نه اوړي.

نوموړی سیمې ته د کانګریس ګوند ځايي دفتر کې فعالانو سره لیدو ته تللی و.

د غوڼدې یوې څنډې کې خبریالانو سره د خبرو پر مهال نوموړي وویل:

" تر اوسه امریکایان هم په بشپړه توګه باروي نه دي، چی خبرې به دوام وکړي او که نه،خو موږ غواړو، چې د خبرو واک له افغان حکومت سره وي. موږ د امریکا د بهرنیو چارو وزیر جان کېري پام هم دې لور ته اړولی دی."

د امریکا حکومت څه موده مخکې له طالبانو سره په قطر او جرمني کې غیر رسمي خبرې پیل کړې، خو افغانستان کې د ‌طالبانو وروستیو بریدونو ته په کتو سره د دې خبرو په باب اندېښنې راپورته شوې.

ورته مطالب