م م د مصر تاتریخوالی خطرناک بللی

مصر
Image caption د مصر جمعې ورځې مظاهرو کې څلور کسان ووژل شول او ۴۰ نور ټپیان شول.

د ملګرو ملتونو عمومي منشي بان کي مون په مصر کې روان تاوتریخوالی خطرناک بللی دی.

نوموړي په دغه هېواد کې یوځل بیا د تاوتریخوالي د څپو پر راپورته کېدو "سخته اندېښنه" ښوولې ده.

د امریکا حکومت له لاریون کوونکو د سوله ییزو لاریونونو او زغم غوښتنه کړې ده.

د بان کي مون یوه ویاند مارټن نیرسکي ویلي، په مصر کې د تېرې جمعې ورځې پېښې د دغه هېواد لپاره "ډېرې خطرناکې" دي.

د جمعې ورځې په تاوتریخوالي کې لږترلږه څلور کسان ووژل شول او ۴۰ نور ټپیان شول.

دغه نښته د هېواد بېلابېلو سیمو کې د پولیسو او لاریون کوونکو ترمنځ وشوې.

د مصر بېلابېل لوی ښارونه د مخکني ولسمشر محمد مرسي تر نیول کېدا او له واکه تر لیرې کېدا وروسته د خونړیو پېښو او ولسي لاریونونو شاهدان وو.

دغه مظاهرې "د انقلاب ضد او د ولسي ملاتړ د ملي ایتلاف" له خوا رهبري کېږي، چې اسلامپالو او اخوان المسلمین ډلو یې د سمبالښت چارې پرغاړه اخیستې دي.

د بان کي مون ویاند زیاتوي، چې "عمومي منشي مصر کې د یوې شاملې سیاسي روغې جوړې غوښتنه کړې، باید بشري حقونو ته بشپړ درناوی وشي، د بندیانو له شکنجې او ځورونې لاس واخیستل شي، او واک په سوله ییز دیموکراتیک ډول د قانون په رڼا کې ولېږدول شي".

خبرداری

په قاهره کې د امریکا سفارت مصر کې خپلو وګړو ته د ډېرو نه ګرځېدو سپارښتنه او خبرداری ورکړی، او دا یې هم ویلي چې اورګاډو کې ډېر تګ-راتګ ونه کړي.

سفارت پر انټرنېټ خپرې کړې خپلې ویناپاڼې کې ویلي، چې شاید د اوونۍ شنبې او یکشنبې ورځو کې مصر کې ډېرې مظاهرې وشي.

د مصر د پوځ ټلوالې او د مرسي د لیرې کېدو مخالفینو د اکتوبر پر شپږمه د لویو مظاهرو بلنه ورکړې ده.

د "شرق اوسط" خبري اژانس د مصري امنیتي سرچینو په حواله ویلي، چې پوځ د سیناء شمال العریش ښار یوه فابریکه کشف کړې، چې د پولیسو او پوځ جعلي یونیفورم یې جوړاوه.

د دې سرچېنې په خبره، امنيتي ځواکونو یو هغه شپږ ویشت کلن ځوان نیولی، چې خپله فابریکه یې د جعلي پوځي یونیفورم لپاره سپارلې ده.

تېره اونۍ، په مصر کې یوې محکمې د اخوان المسلمین ګوند پر ټولو فعالیتونو بندیزولګاوه. په قاهره کې له دغه اداري محکمې نه غوښتل شوي چې د نادولتي سازمان په هکله د دې ګوند عریضه وڅېړي.

ورته مطالب