نايجر د کډوالو د کمپونو تړلو اعلان کړی دی

Image caption په نايجر کې ژغورونکو د هغو ۹۲ کسانو جسدونه موندلي، چې په یوه دښته کې د تندې له امله مړه شوي

د نایجر حکومت وايي، په دغه هیواد کې به د کډوالو ټول کمپونه وتړي. دغه اعلامیه له هغې پیښې څو ورځې وروسته خپره شوې، چې په سهارا دښته کې د ۹۲ کسانو مړي وموندل شول.

اعلامیه کې چې پر تلویزیون ولوستل شوه، دغه راز ویل شوي، ټول کسان به په ګوته شي او سخته سزا به ورکړل شي، چې د شمالي نایجر له لارې کډوال الجزایر او لېبیا ته لیږدوي.

باور دا دی چې موندل شوي جسدونه د کډوالو وو، چې غوښتل يې ځانونه اروپا ته ورسوي.

د نایجر د بهرنیو چارو وزیر محمد بازوم بي بي سي ته وویل، دا مهال یوازې د شمالي ښار اګادیز په غیر قانوني کمپونو کې نژدې ۵۰۰۰ افریقايي کډوال ایسار پاتې دي.

تنده او مرګ

په نايجر کې ژغورونکو د هغو ۹۲ کسانو جسدونه موندلي، چې په یوه دښته کې د موټر د خرابېدو وروسته د تندې له امله مړه شوي دي.

يو ژغورونکی مصطفی الحسن وايي، د قربانیانو جسدونه چې ډېری يې ښځې او ماشومان و، په ډېر بد وضعيت کې و.

دی وایي د مړو د جسدونو ځينې برخې نه وې او د دې شونتيا شته، چې ښايي حيواناتو به خوړلي وي.

د ده په خبره، احتمالآ يو مسافر وړونکی موټر چې د نايجر په شمال کې يې د آرلېت له ښار حرکت کړی و، په يوه دښتنه کې خراب شوی دی.

ښاغلی الحسن وايي دغه پېښه ښايي د سپټمبر مياشتې په وروستيو او يا هم د اکتوبر په لومړیو کې شوې وي.

دی وايي داسې برېښي چې د موټر د هغو لسو سپرليو په ګډون چې ځانونه يې آرلېت ته رسولي او د دغې پېښې خبر يې ورکړی، ځينې يې پلې تللي وي.

کارګر کډوال

Image caption دغه کډوال په دې نيت وتلي وو، چې ځانونه اروپا ته ورسوي

له دې وروسته ژغورونکې ډلې او داوطلبه ځواکونه د دغو تري تم شويو کسانو د موندلو لټه پيل کړه او ځانونه يې د الجزاير په لس کيلومترۍ کې د پېښې ځای ته ورسول.

ګومان دا دی چې دغه کسان کارګر کډوال وو چې له خپلو کورنيو سره د کار موندلو په نيت اروپايي هېوادونو ته د ځان رسولو لپاره له دغې دښتې تېرېدل.

د قربانيانو له نيمايي زيات يې ماشومان او تنکي ځوانان دي.

نايجر اروپايي هېوادونو ته د رسېدو لپاره د مرکزي افريقا د کارګرانو يوه اصلي لار ده، خو ډېری د دوی په شمالي افريقا کې پاتې کېږي.

ورته مطالب