مدينه: هوټل کې اور لګېدو ۱۵ کسه وژلي دي

د انځور حقوق Reuters
Image caption د اور ولګېد پر مهال اشراق هوټل کې نژدې ۷۰۰ زيارت کوونکي موجود وو

په سعودي عربستان کې د مسلمانانو د سپېڅلي ښار مدينې منورې په يوه هوټل کې د اور لګېدو له امله لږترلږه ۱۵ کسه وژل شوي دي.

د سعودي پريس اژانس او عرب نيوز د راپورونو له مخې د شنبې په ورځ په شوې دغه پېښه کې ۱۳۰ کسه نور ژوبل دي.

د مالوماتو له مخې اور مازيګر مهال د برېښنا د شارتۍ له امله رامنځته شوی، خو چارواکو تر اوسه د پېښې د کره لامل په اړه څه نه دي ويلي.

هغه مهال چې اور ولګېد د اشراق په نوم هوټل کې نژدې ۷۰۰ زيارت کوونکي موجود وو.

د اطفايې کارکوونکي له دوه نيمو ساعتونو هڅو وروسته وتوانېدل چې اور کابو کړي.

د سعودي حکومتي خبري اژانس د راپور له مخې د سخت اور له امله د اغېزمن شوي هوټل ترڅنګ يو بل هوټل هم له مسافرو تش شوی دی.

د مډل ايسټ خبري اژانس راپور کاږي په سعودي کې د مصر سفير ویلي چې د وژل شويو څلور يې مصري وګړي دي.

د مصر سفير عفيفي عبدالوهاب ويلي، د مصر په قونسلګرۍ کې يوه کمېټه جوړېږي، چې په دغه پېښه کې د وژل شويو او ټپي شويو مصريانو په اړه مالومات راټول کړي.

له دې وړاندې رويترز اژانس د مصر د حکومتي تلويزيون له قوله ويلي و، چې وژل شوي ټول مصريان دي.

ورته مطالب