امريکا له ج سودان د بهرنيو جنګياليو وتل غوښتي

د انځور حقوق s
Image caption په جنوبي سودان کې د کورنۍ جګړې پر مهال سلګونه کسان وژل شوي دي

امریکا له جنوبي سودان نه د بهرنیو جنګیالو د وتلو غږ کړی او خبرداری یې ورکړی چې ښايي د حکومت او یاغیانو ترمنځ جګړه ټولې سیمې ته خوره شي.

د امریکا د بهرنیو چارو وزرات ویلي دوی د تاوتریخوالي د هغو راپورونو په اړه اندېښنه لري چې له اوربند سره سره رامنځته کېږي.

اوربند يوه مياشت وړاندې د ولسمشر سلوا کيير د حکومت او د ولسمشر د مخکني مرستیال رېیک مشار د پلویانو ترمنځ رامنځ ته شو.

دغه تړون د ايتوپيا په پلازمېنه اديسه بابا کې د افريقايي منځګړو د هڅو په پايله کې وشو.

خو له هغه راوروسته دواړه غاړې يو بل د اوربند پر ماتولو ګرموي، چې هره يې غاړه يې ردوي.

د جنوبي سودان حکومت هغه څرګندونې رد کړي چې ویل کیږي دوی د اوربند ساتنې په موخه سیمې ته سوداني او کانګويي ځواکونه لیږلي.

په جنوبي سودان کې تېر ډسمبر وروسته له هغه کورنی کړکېچ راوټوکېد چې ولسمشر سلوا کيير خپل پخوانی مرستيال د ده پر ضد په کودتا کولو پړ وباله.

پر دغه مهال حکومت د پخواني مرستيال ولسمشر ۱۱ نژدې ملګري له ده سره د همکارۍ په تور ونيول.

خو پخوانی مرستيال رېيک مشار پر ده او د ده پر ملګرو لګېدلي تورونه له يوې مخې ردوي.

ورته مطالب