ناټو د اوکراین پولوڅارنې ته اواکس الوتکې استوي

د انځور حقوق AFP
Image caption ناټو وايي اواکس الوتکې به د ناټو قلمرو د ننه الوتنې کوي.

د ناټو یوه ویاند خبریالانو وویل، ناټو هوډ کړی، چې اوکراین کې یې څارګرې الوتکې فعالیت پیل کړي.

ویاند زیاتوي چې "اواکس الوتکې به یوازې د ناټو قلمرو پر اسمان الوتنې کوي".

ناټو وايي، له دې څارنې هدف دا دی چې "اوکراین کې کړکېچن وضعیت وڅاري".

دا څرګندونې وروسته تر هغه شوې، چې روسیه د کریمیا ټاپووزمې پر سر له اوکرای سره رامنځ ته شوې لانجې ته د حل لار لټوي.

په پام کې ده، چې راتلونکې یکشنبې له روسیې سره د کریمیا د یوځای کېدو پر سر ټولپوښتنه وشي، او یا دا چې یوه خپلواکه اداره ولري.

خو اوکراین او لوېدیځ دغه ټولپوښتنه ناقانونه بللې ده.

پوځي روغتون

په کریمیا کې د تازه رپوټونو له مخې، روسي ځواکونو او د دوی ملاتړو سیمه ییزو ملېشو یو پوځي روغتون نیولی دی.

روسي ځواکونو او اړوندو ملېشو د سیمفروپول پوځي روغتون هغه مهال ونیو، چې کارکوونکي یې وګواښل شول.

په دې روغتون کې نژدې ۳۰ ناروغان وو.

دغه روغتون د اوکراییني ځواکونو اړوند دی، چې ناروغان یې هم د اوکرایین ټپي شوي پوځیان او مخکني جنګیالي دي.

د روغتون مشر ویلي چې دوی په زور له روغتون وتلو او موټرو کې سپرېدو ته اړ شوي دي.

د روسیې اړوندو ځواکونو هم منلې ده، چې په کریمیا کې یې د اوکرایین ځواکونه کلابند کړي.

خو روسي ځواکونو په کلابندۍ کې خپله ونډه رد کړې ده.

د روسیې اړوندو په کریمیا کې د اوکراییني ځواکونو د یوې اډې نیولو هڅه هم کړې ده، خو اوکراییني ځواکونو د بریدونو پرضد په هوا کې اخطاریه ډزې هم کړې.

لاهم د دواړو لورو ترمنځ خبرې روانې دي.

په کریمیا کې د بي بي سي خبریال کریسټین فرایزر وايي، د روسیې اړوندو ځواکونو په تدریجي ډول پر کریمیا د اوکراییني ځواکونو د واک کمولو هڅې پیل کړې دي.

د کییف حکومت، د امریکا متحدو ایالتونو او اروپايي ټولنې روسیه د اوکراییني خاورې په نیولو تورنه کړې ده، چې وايي په دې سره یې د نړیوال قانون سرغړونه کړې.

ناټو تېره اونۍ ویلي وو، چې له روسیې سره د مرستو پرسر بیا کتنه کوي.

ورته مطالب