پاکستان له طالبانو سره مخامخ خبرې پیلوي

د انځور حقوق AP
Image caption حکومت له طالبانو سره د خبرو لپاره نوې کمېټه جوړه کړې ده.

د پاکستان حکومت ویلي، چې له طالبانو سره په دویم پړاو کې مخامخ خبرې پیلوي. د کورنیو چارو پاکستاني وزیر چوهدري نثار علي ویلي، د خبرو لپاره یې حکومتي کمېټه ټاکلې ده.

دغه خبرې په شمالي وزیرستان کې کېږي.

تېره میاشت د یوې حکومتي کمېټې او د طالبانو د مرکچیانو ترمنځ خبرې پیل شوې، چې د وسله والو طالبانو له خوا د یوې میاشتې لپاره اوربند اعلان شو.

د طالبانو د اوربند شرط دا و چې حکومت به تر یوې میاشتې پورې وزیرستان کې بریدونه دروي، چې په دې سره د دواړو غاړو ترمنځ خبرو ته لاره هواره شي.

ټاکل شوې ده چې طالب مرکچیان نن (پنجشنبه/ مارچ ۱۳) شمالي وزیرستان ته سفر وکړي او د خبور د نوي پړاو په اړه له طالبانو سره سلا مشورې وکړي.

طالبانو تر دې مخکې نېِغ په نېغه د خبرو لپاره د یوې جرګه ګۍ اعلان نه دی کړی.

د طالبانو له لوري د سولې د خبرو د کمېټې یوه غړي پروفیسر ایراهیم شمالي وزیرستان ته تر تګ وړاندې خبریالانو ته وویل چې ډېر ژر به پاکستاني ولس ته د امن او سولې زېری ورکړي.

هغه وویل، چې د خبرو لومړی پړاو بریالی و، او دویم پړاو به هم کامیابۍ ته ورسوي.

د پاکستان د کورنیو چارو وزارت د طالبانو مرچیانو ته د لېږدولو لپاره چورلکه ورکړې ده.

د انځور حقوق Getty
Image caption د پاکستان د کورنیو چارو وزیر چوهدي نثار علي له مولانا سمیع الحق سره کتلي دي.

مولوي یوسف شا ابراهیمي، چې د طالبانو د خبرو د کمېټې د مشر مولانا سمیع الحق د جمعیت علمای اسلام استازی او د وزیرستان پلاوي غړی دی، وايي، چې د طالبانو د سیاسي کمېټې له غړو سره به د مخامخ خبرو لپاره پر خپلې تګلارې خبرې وکړي.

ښاغلي یوسف شاه وویل، چې تر اوسه ورته طالبانو د خپلو شرطونو په اړه هېڅ نه دي ویلي.

حکومت د لوړپوړو چارواکو یوه نوې کمېټه هم جوړه کړې ده، چې له طالبانو سره به مخامخ خبرې پیلوي.

بل خوا، طالبانو ویلي چې ډېری حکومتي کړۍ د سولې ناکامول غواړي، چې په وینا یې امنیتي ادارو اوس هم د طالبانو د نیولو، ربړولو او چاپهې وهلو ته دوام ورکړی.

د طالبانو ویاند شاهدالله شاهد وویل، چې طالبان به د مارچ د لومړۍ نېټې د اوربنددرناوی کوي.

ورته مطالب