قاهره کې ناپېژاندو وسله والو ۶ مصري پوځيان وژلي

د انځور حقوق AP
Image caption پر تېره پنجشنبې یو ضابط هغه مهال ووژل شو او درې نور پوځيان ټپیان شول، کله چې د دوی پر موټر برید وشو.

د مصر پلازمېنې قاهرې شمالي قلیوبیه ولایت الخیمه سیمه کې د تلاشۍ پر یوې پوستې د ناپېژاندو وسله والو برید لږترلږه شپږ مصري پوځي پولیس وژلي دي.

د مصر پوځ وايي، په سیمه کې یې دوه خښ کړای شوي ماینونه هم شنډ کړي دي.

پوځ د دغه برید پړه نېغه په نېغه پر اخوان المسلمین ګوند اچولې ده، خو دغې ډلې په دې برید کې لاس لرل رد کړي دي.

د پوځ ویاند ډګروال احمد علي ویلي، ځینو وسله والو "چې د اخوان المسلمین ګوند اړوند ترهګر وو- د پوځي پولیسو پر یوې پوستې برید کړی دی".

نومووړي پر خپلې رسمي فېسبوک پاڼې لیکلي، چې "وسله والو د پوستې ترڅنګ دوه ماینونه هم خښ کړي، چې هدف یې د ځواکونو وژل وو".

د دغه مصري ویاند په خبره، په قلیوبیه کې د برید تر پوستې تر دوو کیلومترو پورې امنیتي اغزن تارونه وغځول.

بل خوا، د مصر لومړي وزیر ابراهیم محلب ویلي، چې د دغو پولیسو قاتلین به ژر ومومي او قانون ته به یې وسپاري.

برید د ګهیځ پر پنځه نیمو بجو هغه مهال شوی، چې پوځيان د ګهیځ پر لمانځه ولاړ وو.

پوځ وايي، د دغو پوځیانو د وینې تویېدو سره د ترهګرۍ پرضد د جګړې هوډ لا پسې ډېر شوی دی.

د شنبې ورځې دغه برید په تېرو څو ورځو کې د مصر پر پوځ پخپل ډول کې دویم برید دی.

پر تېره پنجشنبې یو ضابط هغه مهال ووژل شو او درې نور پوځيان ټپیان شول، کله چې د دوی پر موټر برید وشو.

ورته مطالب