د جي اوه ډلې پر روسیې د نورو بندیزونو پرېکړه کړې

د انځور حقوق Reuters
Image caption د جي اوه ډله وايي روسیه په اوکرایین کې د تاوتریخوالي په کمولو او د جینیوا پر تړون عمل کولو کې پاتې راغلې.

د نړۍ د اوو لویو اقتصادي ځواکونو ډلې/جي اوه پرېکړه کړې چې د اوکرایین د روان کړکېچ په تړاو پر روسیې نور بندیزونه هم ولګوي.

د دې ډلې په وینا روسیه په اوکرایین کې د تاوتریخوالي په کمولو او د جینیوا پر تړون عمل کولو کې پاتې راغلې.

ټاکل شوې ده چې د یو شمېر اروپایي هېوادونو دیپلوماتان د دوشبنې په ورځ په دې اړه یوه بېړنۍ غونډه وکړي.

سپینې ماڼۍ ویلي دا نوي بندیزونه به تجارتي بڼه ولري، او د دوشنبې تر ورځې پلې کېدلای شي.

خو بریتانیا بیا هېله ښودلې چې لا هم د اوکرایین ستونزې ته د یو دیپلوماتیک حل موندلو امکان شته.

په لندن کې د مسکو غږ راډیو مشر ډیمیټري لینیک وايي روسیه حق لري چې له خپلو ګټو دفاع وکړي.

"لویدیځ نه غواړي چې د اوکرایین د کرکیچ په ژورو او اصلي لاملونو ځان پوی کړي. دوی په دې سر نه خلاصوي چې دا ستونزه یو تاریخي شالید هم لري. لکه د روسیې او د اوکرایین د ختیځې برخې د اوسیدونکو ترمنځ اړیکي. دا خلک اوس هم ځان یو ګڼي. خو لویدیځ دا حقیقت نه مني."

بل لور ته د اروپا د امنیت او همکارۍ په سازمان کې د روسیې استازي ویلي هېواد به یې د هغو اروپايي پوځي څارونکو د خوشې کولو پوره هڅه کوي چې د اوکرایین په ختیځ کې د روسي پلوه بیلتون پالو له خوا نیول شوي دي.

دغه اته تنه څارونکي او یو شمېر اوکراییني پوځیان پرون د سلویانسک په ښار کې نیول شوي وو.

ځایي ملیشو تور لګولی چې دې ډلې په سیمه کې د ګډوډۍ جوړولو هڅه کولو.

په سیمه کې یو شمېر ژورنالیستان هم نیول شوي دي.

خو د بي بي سي یو خبریال وروسته له هغې چې د وسله والو له خوا پرېښودل شو، وویل چې په سیمه کې هېڅ ډول نظم او امنیت نشته، او ډېر احتمال شته چې اوکراییني ځواکونه دې دلته پوځي عملیات پيل کړي.

ورته مطالب