م م: ایران حساسیت پاروونکې اتومي زېرمې کمې کړې

د انځور حقوق Reuters
Image caption د نړیوالې اتومي انرژۍ څارونکې اداره له ایران سره د هغو تړونونو عملي کېدل څاري چې دې هېواد له شپږو ځواکونو سره لاسلیک کړي وو.

د ملګرو ملتونو د اتومي انرژۍ سازمان وايي ایران د دغه هېواد اتومي پروګرام په اړه له شپږو نړیوالو قوتونو سره د شوې هوکړې له مخې نږدې ۸۰ سلنه حساسیت پاروونکي اتومي زېرمې کمې کړې دي.

د اتومي سازمان په یوه سري راپور کې چې بي بي سي یې په اړه معلومات ترلاسه کړي راغلي، چې ایران په شپږو کلونو کې د لومړي ځل لپاره د اتومي بم جوړولو لپاره د مشکوکو څېړنو د لیدلو اجازه هم ورکړې ده.

په ویانا کې د بي بي سي خبریال وايي دا وروستی راپور به هغو نړیوالو قوتونو لپاره د خوشحالۍ خبر وي چې غواړې له ایران سره د دغه هېواد د اتومي پروګرام په اړه جوړ جاړی وکړي.

ایران تینګار کوي چې اتومي پروګرام یې یواځې سوله ییز هدفونه لري.

د یورانیمو چاڼ زېرمې

تېره اپریل میاشت کې د ملګرو ملتونو د اتومي انرژۍ د څار ادارې مسوولینو وویل، چې ایران د شویو تړونونو له مخې د خپلو لوړو یورانیمو د چاڼ زېرمې تر نیمایي کمې کړې دي.

د نړیوالې اتومي انرژۍ څارونکې اداره له ایران سره د هغو تړونونو عملي کېدل څاري چې دې هېواد له شپږو ځواکونو سره لاسلیک کړي وو.

دغه ځواکونه له ایرانه غواړي چې د خپلو یورانیمو د چاڼ کچه راټيټه کړي، ځکه دوی وېره لري چې ایران ښايي یورانیم د اتومي وسلې جوړولو له پاره وکاروي.

لوېدیځ د ایران د اتومي پروګرام په اړه شک لري او فکر کوي چې ایران د اتومي بم جوړولو په هڅه کې دی.

خو ایران ټينګار کوي چې پروګرام یې یوازې سوله ییزې موخې لري او د اتومي وسلې د جوړولو په لټه کې نه دی.

ورته مطالب