اوباما اوکرایین کې د روسیې "تور تکتیکونه" وغندل

Image caption ښاغلي اوباما د اوکرایین له نوي انتخاب شوي ولسمشر سره ولیدل او له کییف سره یې د همکارۍ ژمنه وکړه.

د امریکا ولسمشر باراک اوباما په اوکرایین کې د روسیې "تېری" وغانده.

په پولنډ کې د کمونیستي نظام د پای ته رسېدو د ۲۵مې کالیزې په مراسمو کې د خبرو پرمهال ښاغلي اوباما په پولنډ کې دیموکراسي د ګاونډي اوکرایین لپاره یوه رڼا وبلله.

نوموړي وویل "موږ څنګه کولای شو چې په ۲۱مه پیړۍ کې د ۲۰ مې پیړۍ تورو تکتیکونو ته اجازه ورکړو."

تر دې وړاندې ښاغلي اوباما د اوکرایین منتخب ولسمشر پیټرو پروشینکو سره ولیدل او په اوکرایین کې یې د سولې د ټینګولو په برخه کې د همکارۍ ژمنه وکړه.

د امریکا ولسمشر ښاغلي پرشینکو د اوکرایین د مشرۍ لپاره هوښیارانه انتخاب وباله او ویې ویل که نړیواله ټولنه د اوکرایین ترشاه ودرېږي نو دا هېواد به له انرژۍ ډکه او پرمختللی دیموکراسي شي.

ښاغلي پروشینکو چې په خپله یو شتمن کس دی د می په میاشت کې انتخاب شو او د راتلوونکې شنبې په ورځ به د اوکرایین د ولسمشر په توګه لُوړه وکړي.

ښاغلي اوباما له کییف سره د پنځو میلیونو ډالرو په ارزښت د پوځي وسایلو د مرستې اعلان هم وکړ.

تر دې وړاندې د مارچ په میاشت کې هم امریکا له اوکرایین سره د ۱۸ میلیونو ډالرو په ارزښت د پوځي وسایلو د مرستې اعلان کړی و.

ښاغلی اوباما اوس برکسلز ته تللی چې د اوو لویو صنعتي هېوادونو په غونډه کې برخه واخلي.

دا له هغه وروسته چې روسیه د کریمیا د نیولو په اعتراض د اتو لویو صنعتي هېوادونو له ډلې وایستل شوه لومړنۍ غونډه ده چې ترسره کېږي.

ورته مطالب