روس پلوو یاغیانو ټول اروپاي ناظرین ازاد کړل

د انځور حقوق Reuters
Image caption له یاغیانو څخه د لویدیځو هیوادونو غوښتنه وه چې یرغمل شوي کسان خوشي کړي

د اوکراین په ختیځ کې روس پلوو یاغیانو د اروپا د امنیتي مرستو د سازمان څلور ناظرین خوشي کړي، په دې اساس بیلتون غوښتونکو ټول یرغمل کړي ناظران خوشي کړي دي.

د اروپا د مرستو او امنیت سازمان اته ناظرین تېره میلادي میاشت د اوکراين په ختيځ کې یرغمل شوي وو.

دوی په داسې حال کې خوشې کیږي چې د اوکرایني ځواکونو او یاغیانو ترمنځ اوربند اعلان شوی.

د دولت او روسیې پلوه بیلتون غوښتونکو ترمنځ د سولې او منځګړيتوب لپاره مذاکرات روان دي او د اروپا د امنیت سازمان او مرستو استازي په دې خبرو اترو کې برخه لري.

د اوکراین ولسمشر پيتروپروشينکو د یوې اوونۍ اوربند درې ورځې نور هم وغځاوه. دا اوربند به د دوشنبې پر ورځ پای ته ورسیږي.

په دې یوه اوونۍ کې چې اوربند و، ځای ځای د دواړ خواو ترمنځ نښتې هم را منځ ته شوې.

د ملګرو ملتونو د شمېرو له مخې په تېرو څه باندې دوو میاشتو کې د روسي پلوه ملېشو او دولتي ځواکونو ترمنځ د اوکراین په ختیځ کې لږترلږه ۴۲۰ کسان وژل شوي.

اوکراین او اروپايي ټولنې تېره جمعه د چنګاښ په شپږمه د اقتصادي مرستو تړون لاسلیک کړ.

د دې تړون پر بنسټ اوکراین به د اړونده غړيتوب په اساس د ځانګړو سوداګریزو تسهیلاتو او د اروپاي ټولنې د اقتصادي مرستو نه به برخمن وي.

د اوکراین ولسمشر د دې معاهدې لاسلیک کول تاریخي بریا وګڼله، خو وویل چې دا معاهده د اوکراین خلکو ته په لوړه بیه تمامه شوه.

له دې معاهدې سره د اوکراین پخواني ولسمشر مخالفت کړ و چې له اروپايي ټولنې سره د اړیکو د پراختیا پلویانو د نیوکو سره مخامخ شو چې په پایله کې د نوموړي د استعفا لامل شو.

د اوکراین په ګډون ورته تړون د شوروي اتحاد له دوو پخوانيو جمهوريتونو ګرجستان او مالداوي سره هم لاسلیک شو.

د روسیې د بهرنیو چارو مرستیال وزیر خبرداری ورکړی چې د دې معاهدې لاسلیک به سختې پایلې له ځانه سره ولري.

روسیې ویلي، که دا معاهده ناوړې اغیزې د روسیې پر اقتصاد پریباسي، نو جدي اقدامات به تر سره کړي.

ورته مطالب