غزه کې د وژل شويو کسانو شمېر ۱۰۰ ته وخوت

فلسطيني سرچينې وايي پر غزه د اسراييلو د هوايي بريدونو په پايله کې د وژل شويو کسانو شمېر ۱۰۰ ته وخوت.

دوی وايي وروستي دوه کسان د جمعې پر ورځ د بيرويج په سيمه کې په يوه موټر کې په نښه کړای شول او ووژل شول.

د انځور حقوق AFP
Image caption فلسطينيان وايي ښايي د وژل شويو شمېره نوره هم وخېژي، ځکه تر اوسه د اوربند هېڅ څرک نه لګېږي

اسراييلو له هغه راهيسې چې د سې شنبې پر ورځ له غزې د توغنديو د درولو په موخه عمليات پيل کړي، سلګونه هوايي بريدونه کړي دي.

تر دې وړاندې د متحد ايالتونو د فلسطينيانو او اسراييلو ترمنځ د يوه اوربند د کېدو لپاره چمتووالی ښوولی و.

ولسمشر اوباما دغه څرګندونوې د اسراييلو له لومړي وزير بنيامن نتنياهو سره د ټيليفوني خبرو پر مهال کړې دي.

د فرانسې ولسمشر فرانسوا اولاند او د روسيې ولسمشر ولادمير پوتين هم د اوربند وړانديز کړی دی.

تر دې وړاندې د ملګرو ملتو سرمنشي بانکي مون له اسراييلو او فلسطينانو څخه پر داسې مهال د اوربند غوښتنه وکړه چې د دواړو خواوو ترمنځ تاوتريخوالی زيات شوی دی.

بانکي مون د امنيت شورا بېړنۍ غونډې ته وويل له حد څخه زيات زور کارول د زغملو نه دي او د دې لوړه بيه ملکي وګړي پرېکوي.

ښاغلي بان په سيمه کې د حالاتو د لا خرابېدو وېره وښوده او ويې ويل چې حالات هره دقيقه له کنتروله وتلی شي:

ده وويل: ''وضعيت بايد په هېڅ ډول نور له کنټروله و نه وځي. د تاوتريخوالي نور خپرېدل خطرناک او بېساري پايلې لرلی شي. دا د ډېرو نازکو ازموينو څخه يوه ده چې په وروستيو کلونو کې سيمه ورسره مخامخ شوې ده. ټول بايد په دې پوه شي چې يوازې د سولې تړون د اسراييليانو او فلسطينيانو لپاره دايمي امنيت راوستلی شي''.

تر دې وړاندې د اسراييلو لومړي وزير ويلي، چې عمليات له پلان سره سم پر مخ روان دي او (تمه ده نور ګامونه) هم واخيستل شي.

ورته مطالب