اسراييلو غزه کې ۲۴ ساعته اوربند منلی دی

د انځور حقوق Reuters
Image caption له هغه راهيسې چې پر غزه بريدونه پيل شوي له ۱۰۰۰ زيات فلسطينيان وژل شوي دي

اسراييلو په غزه کې د ملګرو ملتو هغه وړانديز منلی چې له مخې يې اوربند ۲۴ ساعته نور هم غځول کېږي، خو اسراييلي پوځ ته يې ويلي که بريد پرې وشي، ځواب دې ورکړي.

د کابينې يوې غونډې د شنبې ورځې اوربند د يکشنبې ورځې د شپې تر نيمايي وغځاوه.

دغه اقدام پر داسې مهال پورته کېږي، چې حماس جنګياليو وروسته له هغه چې يوې خوا اوربند ومانه پر اسراييلو د توغنديو ډزې کړې دي.

حماس وايي تر هغه به اوربند ته غاړه کېنږدي چې اسراييلي ځواکونه له غزې و نه وځي او بېځايه شويو فلسطينيانو ته اجازه ور نه کړای شي چې خپلې کورونو ته ستانه شي.

اسراييلو ويلي د اوربند پر مهال به هم د هغو سمڅو پر وړاندې عملياتو ته ادامه ورکړي، چې د حماس له لوري اېستل شوې دي.

حماس اسراييل تورنوي چې ګواکې غواړي د اوربند پر مهال ځان نورو بريدونو ته چمتو کړي او ادعا يې کړې ده چې د شنبې ورځې له اوربند نه هم سرغړونه شوې ده.

راپورونه وايي د شنبې پر ورځ هم حماس جنګياليو پر اسراييلو درې توغندي توغولي او په اسراييلو کې د خطر زنګ کړنګول شوی دی.

د حماس پوځي څانګه قسام لېوا وايي دوی پر اسراييلو د لنډ واټن درې او د نسبتآ اوږد واټن دوه توغندي توغولي دي.

د شنبې ورځې اوربند د تېرې ورځې ماښام په اتو بجو پای ته ورسېد. د غزې خلکو د اوربند په موده کې د وژل شويو کسانو جسدونه راټول کړل او ځان ته يې اوبه او خواړه برابر کړل.

د غزې د روغتيا وزارت وياند وايي د شنبې پر ورځ يې له کنډو کپرو او ويجاړو شويو ځايونو لاندې د ۱۵۰ کسان جسدونه موندلي دي.

د فلسطین روغتیایي چارواکو ویلي چې په غزه کې د اسرائيلي بریدونو په پایله کې د وژل شویو فلسطینیانو شمېر له ۱۰۰۰ اوښتی.

اسرائيلي پوځیانو ۱۹ ورځې وړاندې پر غزې بریدونه پیل کړل.

ورته مطالب