روسیې له لوېدیځه د خوړو پر وارداتو بندیز لګولی

Image caption اروپايي کمیسون ویلي چې د روسیې بندیزونه "په څرګند ډول سیاسي انګیزه" لري.

د اوکراین پر سر د بندیزونو په ځواب کې روسیې د اروپايي اتحادیې، امریکا او ځینو نورو لوېدیځو هېوادونو د خوراکي توکو پر واردلو بشپړ بندیز لګولی دی.

د روسیې لومړي وزیر ډېمتري میدیدوف ویلي چې په دې بندیز کې میوه، سبزیجات، غوښه، ماهي، شېدې او نور د لبنیاتو واردات شامل دي.

دغو بندیزونو پر استرالیا، کاناډا او ناروی هم اغېز کړی دی.

ښاغلي میدیدوف حکومت ته پخپله تلویزیوني وېنا کې وویل چې روسیې پر خپله خاوره کې د اوکراین پر ترانزیتي الوتنو هم بندیز لګولی دی.

نوموړي زیاته کړه چې د روسیې حکومت د اوکراین پر سر د بندیزونو په ځواب کې دې هېواد ته د اروپايي اتحادیې او امریکا پر ترانزیتي الوتنو د بندیز لګولو په اړه هم غور کوي.

دغه بندیزونه به اسیايي هېوادونو ته د الوتنو په بیو کې د پام وړ زیاتوالی راولي.

تېر کال اروپايي اتحاديې د ۱۵.۸ میلیارد ډالرو په ارزښت او امریکا د ۱.۳ میلیارد ډالرو په ارزښت خوراکي توکي روسیې ته صادر کړي وو.

روسیه د نړۍ په کچه تر امریکا وروسته د اروپایي اتحادیې د خوراکي توکو دوهم ستر واردونکی و.

له اروپايي اتحادیې د امریکا د خوراکي توکو واردات ۱۳ سلنه او د روسیې واردات ۱۰ سلنه دي.

اروپايي کمیسون ویلي چې د روسیې بندیزونه (په څرګند ډول سیاسي انګیزه) لري.

دوی د دغو بندیزونو په اړه د خپل غبرګون په باب غور کوي.

لوېدیځ هېوادونه پر روسیې تور لګوي چې دوی د اوکراین په ختیځو سیمو کې د وسلوالو یاغیانو ملاتړ کوي.

تېره میاشت اروپايي اتحاديې او امریکا پر روسیې خپل بندیزونه پراخ کړل.

پر روسیې لومړني بندیزونه هغه وخت ولګول شول چې دوی کریمیا د خپلې خاورې سره یوځای کړه.

د اروپايي اتحادیې وروستیو بندیزونو د پوتین نږدې ملګري لکه میلیاردر ارکادی روټنبرګ، په نښه کړي.

د دې تر څنګ د اروپايي اتحادیې په بندیزونو کې د روسیې د تیلو صادرات او دفاعي تکنالوژۍ هم شاملې دي.

دغو بندیزونو د روسیې حکومتي بانکونو ته د لوېدیځ پانګوالو لاسرسی هم اغېزمن کړی دی.

تېره میاشت د مالیزیا د اېم اېچ ۱۷ الوتکې راغورځېدو چې په کې ۲۹۸ کسان وژل شوي وو د روسیې او لوېدیځو هېوادو اړیکې نورې هم ترینګلې کړې.

د دغې پېښې پړه د اوکراین په ختیځ کې پر روسي پلوه بیلتون غوښتونکو اچول شوې.

داسې ګومان کېږي چې دغه الوتکه د روسیې د راکټي سیستم پر مټ راغورځول شوې ده.

ورته مطالب