امریکايي پوځ سوریه کې د بمبارۍ انځورونه خپاره کړل

د انځور حقوق US DoD
Image caption دا د دوی له لوري د شپې مهال درېیم ځل بمبار دی

د امریکا پوځ د سوریې په ختیځ کې د تېلو پر هغو چاڼ ځایونو د بمبارۍ انځورونه خپاره کړي، چې د اسلامي دولت جنګیالي پرې واکمن دي.

د امریکا هوايي ځواک، سعودي عربستان او اماراتو الوتکو په سوریه کې د تېلو د چاڼ پر ۱۲ ځایونو بمباري کړې ده.

دا د دوی له لوري د شپې مهال درېیم ځل بمبار دی.

د اسلامي دولت جنګیاليو په وروستیو میاشتو کې د سوریې او عراق ډېرې برخې ونیولې.

دوی په دواړو هېوادونو کې د خپلو پوځي لګښتونو لپاره د تېلو له سرچینو ګټه اخلي.

د امریکا د دفاع وزارت له لوري د تېرې پنجشنبې په ورځ د بمباریو دغه انځورونه خپاره شوي دي.

په سوریه کې زموږ خبریال وايي، په نښه شوي چاڼ ځایونه لوی نه دي، بلکې د لږ تېلو د چاڼ چارې پکې مخته وړل کېدې.

دی وايي، امریکا د حسکه ولایت په جبسه او مرکدياو د دیرالزور په حسیان بو کمال او العمر کې د تېلو دغه چاڼ ځایونه ویشتلي.

د امریکا د دفاع وزارت ویلي، دوی د تېلو د چاڼ هغه ځایونه بمبار کړي، چې هره ورځ یې د ۳۰۰ او ۵۰۰ بیرلو (بیلرو) ترمنځ تېل تولید او چاڼ کول.

په واشنګټن کې د دفاع وزارت ویاند امیر البحرجان کیربي ویلي، له بریدونو یې هدف د وسله والو وژل نه دي، بلکې د تېلو د تولید د هغو ځایونو ویجاړول دي، چې اسلامي دولت ترې په تور بازار کې ګټه اخلي او پوځي لګښتونه ورباندې پرې کوي.

نوموړی وايي:" که څه هم پر اسلامي دولت بریدونه دوام لري، خو ښکاري چې دوی د تمویل لپاره نورې سرچینې هم لري." دی وايي:"لاهم اسلامي دولت ډېر رضاکاران لري، وسلې او داسې پوځي مهمات لري، چې په سیمه کې یوې او بلې خوا ته خوځېږي."

د پنتاګان ویاند وايي، لاهم وختي دی، چې پر اسلامي دولت د بریا اعلان وشي.

امیر البحر کیربي وايي، هغو رپوټونو خواشینی کړی، چې ګني په دغو بریدونو کې د اسلامي دولت د جنګیالیو ترڅنګ ۱۴ ولسي وګړي هم وژل شوي، خو وايي دفاع وزارت د دغو رپوټونو د کره کولو په درشل کې دی.

پر ټولیزو رسنیو ځینې داسې انځورونه خپاره شوي، چې ګني د امریکا په مشرۍ په سوریه کې بمبارۍ د ماشومانو او ښځو په ګډون ولسي وګړي وژلي دي.

د امریکا پوځ وايي، د سعودي عربستان او اماراتو لسګونو الوتکو د تېرې چارشنبې پر شپه د شپږو امریکايي الوتکو ترڅنګ په سوریه کې بمباري وکړه.

د سوریې په شمال کې، کردان وايي، جنګیالي یې د اسلامي دولت د جنګیالیو د پرمختګ د مخې په ډب کولو کې بریالي شوي.

دوی دا څرګندونې وروسته تر هغه کړې، چې له دغو شمالي سیمو ګاونډۍ ترکیې ته لسګونه زره کردان د ناامنیو له کبله وتښتېدل.

کردي ځواکونه وايي، اسلامي دولت یې اړ کړ چې ترکي پولې ته څېرمه له کوباني ښار لیرې شي.

د اسلامي دولت جنګیالیو د کوباني ښار شاوخوا سیمو تر نیولو وروسته پر دغه ښار هم کړۍ راتنګه کړې وه، او تر ۱۴۰ زرو ډېر وګړي یې خپلو مېنو پرېښودو ته اړ کړي وو.

ورته مطالب