کردي جنګیالي: د کوباني غر مو بېرته نیولی

د انځور حقوق BBC World Service
Image caption کردي جنګیالیو دغه پرمختګ د امریکا په مشرۍ د ایتلافي ځواکونو له هوايي بریدونو نه وروسته کړی دی.

کردي جنګیالي چې د اسلامي دولت ډلې سره په جګړه کې ښکېل دي وايي دوی سوریه کې ترکیې سره پر پوله د کوباني په لوېدیځ کې د تل شایر په نامه له ستراتېژیک پلوه یو مهم غر نیولی دی.

کردي جنګیالیو دغه پرمختګ د امریکا په مشرۍ د ایتلافي ځواکونو له هوايي بریدونو نه وروسته کړی دی.

د اسلامي دولت جنګیالیو، چې دغه سیمه یې له یوې میاشتې راهیسې کلابنده کړې، د تل شایر غر ۱۰ ورځې وړاندې نیولی و.

په پام کې ده چې د امریکا ولسمشر بارک اوباما د سې شنبې پر ورځ په واشنګټن کې د ۲۰ نه د ډېرو هېوادونو د پوځي مشرانو سره د اسلامي دولت ډلې پر وړاندې په سوریه او عراق کې د مبارزې پر لارو چارو خبرې اترې وکړي.

خبریالان د واشنګټن غونډې ته په اشاره وايي د امریکا په مشرۍ د ایتلاف له جوړېدو وروسته دا لومړی ځل دی چې دومره لوړ پوړي پوځي چارواکي سره یو ځای کېږي.

د انځور حقوق BBC World Service
Image caption په تېره میاشت کې لسګونه زره سوري وګړي چې ډېری یې کردان دي له کوباني تېښتې ته اړ شوي دي.

بل خوا ترکي جنګي الوتکو د عراق پولې سره نږدې د هکري په ولایت کې د کردستان د کارګرو ګوند (پي کی کی) پر هدفونو بمبارۍ کړې دي.

د ترکي رسنیو په وینا په برید کې یاغیانو ته (درنه مرګژوبله) اوښتې ده.

که د دې خبر پخلی وشي نو دا به په ۲۰۱۳ کال کې پر یوه اوربند له هوکړې وروسته د ترکیې له خوا پر (پي کی کی) لومړی ستر هوايي برید وي.

ځانمرګي بریدونه

د کوباني ښار، چې اکثریت اوسېدونکي یې کردان دي، جګړه د ایتلافي ځواکونو لپاره د هوايي بریدونو له لارې د اسلامي دولت د شا تمبولو په برخه کې یوه مهمه ازموینه ده.

د کوباني شاوخوا سیمو کې د اسلامي دولت پر هدفونو د دوو اونیو هوايي بریدونو کردي جنګیالیو ته دا فرصت ورکړی چې د جهادیانو د پرمختګ مخه ونیسي.

خو د ترکيې او لوېدیځې نړۍ مشرانو خبرداری ورکړی چې دغه ښار ښايي بیا سقوط وکړي.

د سوریې د بشري حقونو یوې ډلې راپور ورکړی چې اسلامي دولت ډلې درې بېلا بېل ځانمرګي بریدونه کړي دي.

د اسلامي دولت ډلې یو ځانمرګي بریدګر له چاودېدونکو توکو ډک یوه موټر ته د ښار په شمالي برخه کې پولې ته څېرمه چاودنه ورکړې ده.

دویم بریدګر ختیځه سیمه، چې د پولیسو مرکز او حکومتي ادارې په کې موقعیت لري، په نښه کړې ده.

وروسته درېیم ځان وژونکي د کردي ځواکونو په مرکز برید کړی دی.

د بشري حقونو دغې ډلې ویلي چې اسلامي دولت ډله اوس د کوباني نیمايي برخه تر خپل کنترول لاندې لري.

ورته مطالب