د اولاند پر قزاقستاني انځور د فرانسویانو ملنډې

فرانسوا اولاند او نور سلطان نظرباییف د انځور حقوق
Image caption دا انځور د قزاقستان د ولسمشرۍ ماڼۍ کې اخیستل شوی.

فرانسویانو د ولسمشر فرانسوا اولاند پر هغه انځور ملنډې وهلې او په ټویټر یې مسخره آمیزه پیغامونه خپاره کړي، چې په قزاقستان کې یې له قزاقي ولسمشر نور سلطان نظرباییف سره یې د هغه له خوا ډالۍ شوې خولۍ پکې پر سر کړې ده.

اولاند په دې انځور کې له خپل قزاقي سیال سره د قزاقستان دودیزه خولۍ او چپنه اغوستې ده.

دا انځور د تېرې جمعې پر ورځ ددواړو مشرانو ترمنځ د قزاقي پلازمېنې استانې د ولسمشرۍ په ماڼۍ کې د کتنې پرمهال اخیستل شوی.

که څه هم د جمعې پر ورځ دغه انځور د قزاقستان د ولسمشرۍ د دفتر له خوا پر انسټیګرام خپور شوی، خو کله چې د فرانسویانو له خوا ډېرې ملنډې پرې ووهل شوې، د شنبې په ورځ بېرته لیرې کړای شو.

خبري رسنیو ویلي، چې د ایلیزه د ماڼۍ پر دې کار سخت خپګان ښودلی چې په وینا یې "د ایلیزه غوسه وروسته تر هغه ډېره شوه، چې په قزاقي دودیزو کالیو کې د فرانسوا اولاند انځور خپور شو."

د "لوژورنال دو دیمانچ" ورځپاڼې پر وېبپاڼه لیکل شوي: "اولاند له قزاقي سوی سره... هغه انځور چې د ایلیزه غوسه یې پارولې ده."

د "ولسي خوځښت لپاره یووالی" په نامه د ښي اړخي سخت دریځ ګوند فعالانو د فرانسوي ولسمشر د ملنډو لپاره د انځور په خپرېدو سره موقع پیدا کړه، خو ځینو بیا له اولاند نه دفاع کړې ده، چې وايي، د بل کلتور د خلکو کالي اغوستل هېڅ پروا نه کوي.