هکرانو د امریکا مرکزي قوماندې ټویټر او یوټیوب هک کړي

د انځور حقوق BBC World Service

انټرنېټي غلو د امریکا د مرکزي قوماندې د ټویټر او یوټیوب پاڼې ماتې کړې دي. باور کېږي، چې دا کار به د ''اسلامي دولت'' ډلې پلویانو کړی وي.

برید کوونکو یو پیغام پرېښی چې وايي: ''امریکايي پوځيانو! موږ درځو هوښیار اوسئ''.

دوی د (الکترونیکي خلافت) شعار هم لیکلی، چې وايي دا د امریکا د مخکینیو او اوسنیو افسرانو اړوند دی.

انټرنېټي هکرانو پر ټویټر لیکلي‌ ''موږ دلته یو،‌ موږ ستاسې د خصوصي کمپیوټرونو په سیستم کې یو، موږ په هره پوځي اډه کې یو.''

د امریکا مرکزي قوماندې ویلي ''په دې اړه دوی اجرآت پیل کړي دي''.

پر ټویټر یې هېڅ نه لیکل کېږي.

دا کار داسې مهال شوی، چې د امریکا ولسمشر بارک اوباما د الکترونیکي امنیت په اړه یوې وینا ته چمتووالی نیسي.

د اوباما ویاند جوش ایرنسټ ویليو امریکا د انټرنېټي غلو پېښه څېړي.

د انځور حقوق BBC World Service
Image caption لږترلږه د پنتاګون یو سند افشا شوی، چې وړاندې ددفاع وزارت پر وېبپاڼه و

دی زیاتوي، په دې اړه پلټنه پیل شوې ده.

خو د امریکا په دفاع وزارت کې یوه جګپوړي چارواکي رویټرز اژانس ته ویلي، د انترنېټي هکرانو دا پېښه امنیت ته یو ګواښ دی.

په بي بي سي کې د دفاعي چارو خبریال جنتن مارکس وايي، زیاتره خپاره شوي معلومات پټ اسرار نه دي.

هکرانو د شمالي کوریا هغه نقشې خپرې کړې دي، چې د خلکو ګڼه ګوڼه او د اتوم‍ي جوړونې ځایونه او د توغندیو د ویشتلو د قوماندې ځایونه پکې ښودل کېږي.

خو مارکس وايي، د امریکا د ګڼو څېړنیزو مرکزونو پر وېبپاڼو دې ته ورته نقشې لیدل کېدای شي.

د امریکا متحده ایالتونه له ګڼو نورو هېوادنو سره په ګډه، په عراق او سوریه کې د ''اسلامي دولت'' پروړاندې د یوه ایتلاف مشري کوي.

د انځور حقوق BBC World Service