د اوکرايين په ختيځ کې سخته جگړه روانه ده

د انځور حقوق
Image caption د ونتڅک اوسېدونکو وويل شپې مهال يې سختې ډزې اورېدلي او پر ناپوځي سيمو هم توغندي پرېوتي دي

د اوکرايين د ختيځ دونتڅک ښار هوايي ډگر شا و خوا ته سخته جگړه روانه ده.

د اوکرايين ولسمشرۍ دفتر يوۀ چارواکي ويلي حکومتي ځواکونو د روسي پلويو بېلتونپالو په وړاندې ځوابي سخت عمليات پيل کړي دي.

وړاندې يوۀ بل چارواکي ويلي و چې د اوکرايين پوځيانو نژدې ټول هوايي ډگر نيولى دى.

.

په پلازمېنه کييف کې ولسمشر پېترو پروشېنکو او لومړي وزير ارسيني يتڅنيوک يوې لويې غونډې کې گډون وکړ.

غونډه هغو ١٢ ولسي وگړو ته د پېرزوينې وړاندې کولو لپاره جوړه شوې وه چې تېره سه شنبه د حکومتي ځواکونو يوې پوستې سره نژدې يې پر بس گاډي توغندى ولگېد او ووژل شول.

دا په تېر سپتمبر کې د روسي پلويو بېلتونپالو او اوکراييني حکومت ترمنځ د اوربند له شوې هوکړې وروسته د خپل ډول ترټولو بده پېښه ده.

په مېنڅک کې د لاسلیک شوي هوکړه لیک ځينې شرايط دا و چې دواړه خواوې د ۳۰ کیلومترو په شاوخوا کې یوه پوله بېلوونکې کرښه جوړوي او ټول بهرني اورپکي به د نښتې له سیمې نه ايستل کېږي.

همدارنګه دواړې غاړې په دې سره سلا شوې وې چې د شخړې له سيمې به پر پوځي الوتنو هم بندير وي.

خو ډېرى دغه شرطونه د بېلابېلو دلايلو پر بنسټ پر ځاى نشول.

ملګري ملتونه وايي، په اوکراین کې د اپریل میاشت کې له پیل شوي تاوتریخوالي راهیسې له ۴۳۰۰ نه ډېر کسان وژل شوي او شاوخوا یو میلیون کسان بې کوره شوي دي.

ورته مطالب