اسلام اباد کې د رویټرز خبري اژانس مشره مړه شوې

د انځور حقوق bbc
Image caption د پوليسو يوه مشر عبدالستار بي بي سي ته وويل ماريا په ځايي روغتون کې ساه ور کړه

د بريتانيا خبري رسنۍ رويټرز يوه ښځينه خبرياله ماريا ګلوونينا په اسلام اباد کې کې مړه شوه.

ماريا چې په خټه روسۍ وه له تېرو دوو کلونو د افغانستان او پاکستان لپاره د رويټرز خبري رسنۍ مشره وه.

د ځايي پوليسو په وينا د ماريا د کور ساتوونکي پوليسو ته خبر ورکړی و چې ماريا د کوټې دروازه نه پرانيزي.

له دې وروسته پوليس د پېښې ځای ته ورسېدي او د کوټې دروازه يې ورماته کړې وه. ماريا د بې هوښۍ په حالت کې روغتون ته وړل شوې وه.

د پوليسو يوه مشر عبدالستار بي بي سي ته وويل ماريا په ځايي روغتون کې ساه ورکړه. ويل کېږي د ماريا مړی د نورو پلټنو لپاره يو بل روغتون ته لېږدول شوی دی.

د پاکستان د طبي ساينس وياند ډاکتر وسيم خواجه وايي په ښکاره توګه د ماريا پر بدن د زور زياتې کومې نښې نه ښکاري او داسې ښکاري چې په طبعي مرګ مړه شوې ده.

پاکستان کې د رويټرز خبري رسنۍ کارکوونکو په دې اړه له خبرو ډډه کړې ده.